ԵՐԵՎԱՆ, 23 ՀՈԿՏԵՄԲԵՐԻ, ԱՐՄԵՆՊՐԵՍ: Խորվաթիայի մայրաքաղաք Զագրեբում ի պատիվ հայ բռնցքամարտիկների կծածանվի նաև հայոց եռագույնը: 

Եվրոպայի երիտասարդական առաջնությունն աստիճանաբար մոտենում է եզրագծին, կայացան են ¼ եզրափակիչ մենամարտերը:

 Հայ մարզիկներից ¼ եզրափակչի արգելքը հաղթահարեցին 49 կգ քաշային Ալեն Դանիելյանը և 91 կգ քաշային Սերյոժա Հակոբյանը, ովքեր, դուրս գալով կիսաեզրափակիչ, առնվազն ապահովեցին բրոնզե մեդալներ: Կիսաեզրափակիչի ճանապարհին Ալեն Դանիելյանը գեղեցիկ ոճով հաղթեց հունգարացի Դավիթ Կովաչին, իսկ Սերյոժա Հակոբյանը պարտության մատնեց բելառուս Ռոման Կարաչանին: Կիսաեզրափակիչի ուղեգիր նվաճելուն մոտ էր նաև 64 կգ քաշային Արարատ Գյուլբանգյանը, ում ընդամենը մի քանի միավոր չբավարարեց Ռուսաստանը ներկայացնող Իվան Կոզլովսկու հետ պայքարում: Հարկ է նշել, որ սա Արարատ Գյուլբանգյանի առաջին մրցելույթն էր նման հեղինակավոր մրցաշարերում:

«Արմենպրես»-ի հաղորդմամբ, այս մասին տեղեկացնում է Հայաստանի բռնցքամարտի ֆեդերացիան:  

Լավ հանդես եկավ նաև գերծանր քաշային Գնել Մուրադյանը, սակայն վնասվածքի պատճառով չկարողացավ մասնակցել ¼ եզրափակիչ մենամարտին: