Հոկտեմբերի 25-ին Գյումրին կնշի «Քաղաքի օր»-ը
ԳՅՈՒՄՐԻ, 22 ՀՈԿՏԵՄԲԵՐԻ, ԱՐՄԵՆՊՐԵՍ: Հոկտեմբերի 25-ին Գյումրին կնշի «Քաղաքի օր»-ը: Այս մասին հոկտեմբերի 22-ին քաղաքապետարանում կայացած մամուլի ասուլիսի ժամանակ նշեց Գյումրու փոխքաղաքապետ Ռուբեն Սանոյանը:
«Գյումրու օր» տոնակատարությունը, որն ինչպես նախապես հայտարարել էր Գյումրու քաղաքպետարանը, կայանալու էր հոկտեմբերի 5-ին, սակայն անբարենպաստ եղանակի պատճառով՝ հետաձգվեց: Եղանակի պատճառով, այս անգամ էլ տոնակատորությունը կիրականացվի որոշակի ծրագրային փոփոխություններով՝ բացօթյա համերգը, որը նախատեսված էր կենտրոնական հրապարակում՝ Արա Գևորգյանի և Գյումրու սիմֆոնիկ նվագախմբի մասնակցությամբ, տեղի չի ունենա: «Եղանակային պայմանների, մասնավորապես, ցածր ջերմաստիճանի հետ կապված, խնդիրներ կլինեն լարային գործիքների համար, ուստի, բացօթյա համերգ ծրագրում չի ներառվի»,- իր խոսքում նշեց փոխքաղքապետը՝ վստահեցնելով, որ այդ համերգն անպայման տեղի կունենա, բայց գարնանը: Փոխարենը, քաղաքպետարանը խոստանում է բազմաբովանդակ ծրագիր՝ միջոցառումները կմեկնարկեն ժամը 11:00-ից և, բացի կենտրոնական հատվածներից, կիրականացվեն քաղաքի տարբեր հատվածներում, այդ թվում նաև ծայրամասերում: Միջոցառում է նախատեսված նաև Գյումրու Վարդան Աճեմյանի անվան պետական դրամատիկական թատրոնում: Այստեղ համերգային միջոցառումից, պարգևատրումներից բացի, գյումրեցիներին ու Գյումրի այցելած հյուրերին սպասվում են բազմաթիվ անակնկալներ:
«Գյումրու օր» միջոցառման համար ավագանու կողմից հաստատված 17 մլն դրամը, ծրագրային փոփոխությունների արդյունքում, նվազել է՝ այդ օրվա միջոցառումների համար կծախսվի 3.5-4 մլն դրամ, գումարի մյուս մասը կտեղափոխվի պահուստային ֆոնդ:
Արմենուհի Մխոյան
Բաժանորդագրվեք մեր ալիքին Telegram-ում