Թբիլիսիի Սուրբ Մինաս եկեղեցու վերականգնումը կարող է սկսվել գալիք տարի
ԵՐԵՎԱՆ, 23 ՍԵՊՏԵՄԲԵՐԻ, ԱՐՄԵՆՊՐԵՍ: Աշխատանքային այցով Վրաստանում գտնվող ՀՀ մշակույթի նախարարի տեղակալ Արև Սամուելյանը Վրաստանի մշակույթի նախարարության մշակութային ժառանգության պահպանության ազգային գործակալության ղեկավարության հետ սեպտեմբերի 23-ին այցելել է Սբ. Մինաս եկեղեցի և տեղում ծանոթացել իրավիճակի հետ. հորդառատ անձրևների հետևանքով սեպտեմբերի 19-ին փլուզվել է Թբիլիսիի Հավլաբար թաղամասում գտնվող հայկական Սուրբ Մինաս եկեղեցու ծածկի մի մասը:
«Արմենպրես»-ի հաղորդմամբ՝ համատեղ քննարկման արդյունքում ձեռք է բերվել պայմանավորվածություն, ըստ որի` առաջիկայում Վրաստանի մշակույթի նախարարությունը Թբիլիսիի քաղաքապետարանի հետ կսկսեն հուշարձանի մաքրման աշխատանքները, կգնահատվի հուշարձանի կրած վնասի չափը, Վրաստանի մշակույթի նախարարությունը կկազմի հուշարձանի հետագա պահպանման և վերականգնման ծրագիր և կներկայացնի Վրաստանի կառավարություն՝ 2015 թ. հուշարձանի վերականգնման համար բյուջետային ֆինանսավորում ստանալու նպատակով:
Բաժանորդագրվեք մեր ալիքին Telegram-ում