ԱՄՆ-ը Սիրիայի տարածքում օդային հարվածներ է հասցրել ԻԼԻՊ-ի դիրքերի ուղղությամբ
ԵՐԵՎԱՆ, 23 ՍԵՊՏԵՄԲԵՐԻ, ԱՐՄԵՆՊՐԵՍ: Սեպտեմբերի 22-ին ամերկյան կողմը ՄԱԿ-ում Սիրիայի մշտական ներկայացուցիչ Բաշար ալ Ջաաֆարիին տեղեկացրել է, որ Ռակկայում սկսելու է օդային հարվածներ հասցնել ԻԼԻՊ խմբավորման հենակետերի ուղղությամբ: Ինչպես հաղորդում է «Արմենպրես»-ը՝ վկայակոչելով սիրիական ՍԱՆԱ գործակալությունը, այս մասին հայտնել է Սիրիայի արտաքին գործերի և սփյուռքի նախարարությունը: Տեղեկություններ են ստացվել, որ ամերիկյան օդային ուժերը սեպտեմբերի 23-ի առավոտյան հարվածներ են ուղղել Ռակկայում ԻԼԻՊ-ի դիրքերի ուղղությամբ:
Արաբական մեկ այլ աղբյուր տեղեկացնում է, որ ԱՄՆ-ը և նրա համախոհները մոտ 50 հարված են հասցրել Ռակկայի և Դեր Զորի ԻԼԻՊ-ի դիրքերի ուղղությամբ: Հարվածներ են ուղղվել նաև Ջաբհա ան Նուրսա խմբավորման դիրքերի ուղղությամբ: Նախնական տեղեկություններով օդային հարվածների հետևանքով ԻԼԻՊ-ի 20 անդամ են սպանվել: Այլ մանրամասներ դեռ չեն հաղորդվում: Տեղեկություններ չկան այն մասին, թե որ երկրներն են մասնակցում օդային հարվածներին:
Մինչ այդ ԱՄՆ-ը հայտարարել էր, որ ԻԼԻՊ-ի դեմ պայքարում իրեն կաջակցեն ավելի քան 50 երկրներ: ԱՄՆ-ի նախագահ Բարաք Օբաման հայտարարել էր, որ ԱՄՆ-ը պետք է ռազմական գործողություններ կսկսի ԻԼԻՊ-ի դեմ բոլոր այն տարածքներում, որտեղ նրանք առկա են, այդ թվում նաև Սիրիայում: Նա ընդգծել է, որ ապստամբների դեմ պայքարում Վաշինգտոնը չի համագործակցի Դամասկոսի հետ:
Բաժանորդագրվեք մեր ալիքին Telegram-ում