Ադրբեջաներենը մահանում է. «Թրենդ»
ԵՐԵՎԱՆ, 17 ՍԵՊՏԵՄԲԵՐԻ, ԱՐՄԵՆՊՐԵՍ: Ադրբեջաներենը հայտնվել է մահացող լեզուների շարքում: Ինչպես հաղորդում է «Արմենպրես»-ը, այս մասին հայտնում է ադրբեջանական «Թրենդ» լրատվական գործակալությունը:
Նշվում է, որ վերջին 10 տարիներին ադրբեջաներենում 35 հազար նոր բառեր են հայտնվել, որոնք հիմնականում փոխառնվել են անգլերենից եւ թուրքերենից: Ադրբեջանի կառավարությանը կից տերմինաբանության հանձնաժողովի նախագահ Սայալը Սադըգովան հայտնել է, որ ներկայում քննարկվում է ադրբեջաներենին եւս 250 օտարածին բառերի եւ բառակապակցությունների ավելացման հարցը, որոնք կմտցվեն գերատեսչության դեկտեմբերին հրապարակվելիք հատուկ տեղեկագրի մեջ:
Ս. Սադըգովան նշել է, որ նոր բառերից շատերը, որոնք հիմնականում տեխնիկական բնույթի են, լայնորեն օգտագործվում են ԶԼՄ-ների կողմից, սակայն, դեռեւս չեն մտել ադրբեջաներենի ուղղագրական եւ բացատրական բառարաններ: Նրա խոսքով` եթե 2004 թվականին հրատարակված ադրբեջաներենի ուղղագրական բառարանում ընդգրկված էր 70 հազար բառ, ապա բառարանի վերջին հրատարակությունում արդեն 105 հազար բառ կա:
«Նոր բառերը, որոնք հայտնվել են մեր լեզվում, ապագայում ներառվելու են նաեւ ուղղագրական բառարանում: Անհրաժեշտ է նկատի առնել, որ եթե լեզվում նոր բառեր չեն ներառվում, ապա այն մահանում է», -ասել է Ս. Սադըգովան:
Բաժանորդագրվեք մեր ալիքին Telegram-ում