Moody's-ը կանխատեսում է արևմտյան պատժամիջոցների բացասական ազդեցությունը Ռուսաստանի վարկունակության վրա
ԵՐԵՎԱՆ, 15 ՍԵՊՏԵՄԲԵՐԻ, ԱՐՄԵՆՊՐԵՍ: Միացյալ նահանգների և Եվրոպական միության հայտարարած նոր պատժամիջոցները բացասական ազդեցություն կունենան Ռուսաստանի վարկունակության վրա: Ինչպես հաղորդում է «Արմենպրես»-ը` վկայակոչելով ռուսական «Ինտերֆաքս»-ը, այս մասին ասվում է միջազգային հեղինակավոր Moody's Investors Service վարկանիշավորող կազմակերպության վերանայված զեկույցում:
Ըստ վերլուծաբանների` նոր պատժամիջոցները «ճնշում են գործադրում» Ռուսաստանի տնտեսական երկարաժամկետ աճի, ինչպես նաև հարկաբյուջետային և արտաքին դիրքերի վրա, որոնք Ռուսաստանի վարկունակության հիմնական ուժեղ կողմերն էին:
Եվրամիությունը սեպտեմբերի 12-ին հրապարակել էր Ռուսաստանի դեմ սահմանված նոր պատժամիջոցները, որով արգելվել է պարտային ֆինանսավորման կազմակերպումը Ռուսաստանի վառելիքաէներգետիկական երեք ընկերությունների՝ «Ռոսնեֆտ»-ի, «Տրանսնեֆտ»-ի, «Գազպրոմ նեֆտ»-ի համար: ԵՄ-ն արգելք Է սահմանել այդ ընկերությունների՝ շրջանառման ավելի քան 30-օրյա ժամկետով պարտատոմոսերով սակարկությունների եւ նման արժեթղթերի թողարկման կազմակերպմանը մասնակցելու վրա: ԵՄ-ն նաեւ սահմանափակումներ է մտցրել Ռուսաստանի հինգ բանկերի՝ «Սբերբանկ»-ին, ՎՏԲ-ին, «Գազպրոմբանկ»-ին, ՎԷԲ-ին եւ «Ռոսսելխոզբանկ»-ին, փոխառություններ եւ ներդրումային ծառայություններ տրամադրելու վրա:
Բաժանորդագրվեք մեր ալիքին Telegram-ում