ԵՐԵՎԱՆ, 29 ՕԳՈՍՏՈՍԻ, ԱՐՄԵՆՊՐԵՍ: Կարևորելով աշխատակիցների սոցիալական հարցերը, Ճարտարապետության և շինարարության Հայաստանի ազգային համալսարանի (ՃՇՀԱՀ) ռեկտոր Գագիկ Գալստյանի առաջարկով համալսարանի գիտխորհրդի որոշմամբ 2014-ի սեպտեմբերի 1-ից բարձացվում է պրոֆեսորադասախոսական կազմի աշխատավարձը` 20 տոկոսով: Ինչպես «Արմենպրես»-ին տեղեկացրին ՃՇՀԱՀ-ի մամուլի քարտուղար Ժամեն Վիլյանը, հիշյալ որոշման համաձայն, դասախոսի աշխատավարձի նվազագույն շեմը 148 հազար դրամ է, իսկ դոկտոր պրոֆեսորի աշխատավարձի բարձր շեմը` 284 հազար դրամ` առանց լրավճարների: Բարձացվել է նաև սպասարկող անձնակազմի աշխատավարձը: Նախատեսվում է վերանայել նաև համալսարանի ադմինիստրացիայի անձնակազմի աշխատավարձերը:

ՃՇՀԱՀ-ն 2014-ի սեպտեմբերը բարեփոխումներով է սկսում: Ամբողջությամբ արդիականացվել են շենքի ինժիներական ենթակառուցվածքները, ֆիքսված և ինտերնետ կապը, լուսավորության համակարգերը: Դիզայներական լուծումներով վերանորոգվել են շենքի  4 հարկի միջանցքները, որոշ չվերանորոգված սանհանգույցները նորոգվել և կահավորվել են: Առաջին անգամ տեղադրվել են անվտանգության և հակահրդեհային համակարգեր: Առաջիկայում նախատեսվում է վերանորոգել լաբորատորիանները, որոշ չվերանորոգված լսարաններ, աստիճանները, աստիճանավանդակները, հատակը:

Այսուհետ դասերի և դասամիջոցների մասին կազդարարի երաժշտությունը` դասական զանգը փոխարինվել է երաժշտական  տարբեր հնչյուններով, ինչը և ուսանողներին, և դասախոսներին էսթետիկական հաճույք կպարգևի:

2014-ի հունիսից   շենքի դիմացի պուրակում սկսած բարեկարգման աշխատանքները ևս ավարտված են: Տեղադրվել են շուրջ  24  նոր նստարաններ, ցայտաղբյուր, վերատնկվել են աշխատանքների ընթացքում հանված դալար եղևնիները: Խոտածածկվել է մոտ 2000 քմ տարածք: Անցկացվել է կաթիլային ոռոգման համակարգ:

Բուհին կից ստեղծվել է ավտոմեքենաների նոր կայանատեղի` ուսանողների և դասախոսների համար:

Ժասմեն Վիլյանի խոսքով` այս ողջ աշխատանքը հնարավոր է եղել իրագործել բուհի ճիշտ տնտեսական քաղաքականության եւ տնտեսումների շնորհիվ: