ԵՐԵՎԱՆ, 12 ՕԳՈՍՏՈՍԻ, ԱՄԵՆՊՐԵՍ:  ՀՀ վարչապետ Հովիկ Աբրահամյանի գնահատականով` Հայաստանի և Ադրբեջանի նախագահները Սոչիում ցույց տվեցին, որ կողմնակից են խաղաղ բանակցություններով հարցի լուծմանը: Արմավիրի մարզում լրագրողների հետ ճեպազրույցի ժամանակ վաչապետը նշել է, որ վերջին օրերին էականորեն նվազել են սահմանային կրակոցները:

«Սոչիի հանդիպմանը երկու նախագահները ցույց տվեցին, որ կողմնակից են հրադադարին և խաղաղ բանակցությունների արդյունքում հարցի կարգավորմանը: Օրինակ` այս գիշեր եղել է ընդամենը 45 կրակոց, որը բավականին քիչ է, քանի որ մի քանի օր առաջ օրական ավելի քան 4500 կրակոց էր հնչում»,- «Արմենպրես»-ի հաղորդմամբ` ասել է  վարչապետը:

Օգոստոսի 10-ին Սոչիում կայացել է եռակողմ հանդիպում` ՀՀ նախագահ Սերժ Սարգսյանի, Ադրբեջանի նախագահ Իլհամ Ալիեւի եւ ՌԴ նախագահ Վլադիմիր Պուտինի մասնակցությամբ: Հանդիպմանը կողմերը քննարկել էին ԼՂ հակամարտության կարգավորման հարցն ու շեշտել է, որ այն պետք է լուծվի բացառապես խաղաղ ճանապարհով: Ի պատասխան Իլհամ Ալիեւի հայտարարություններին, Նախագահ Սարգսյանը հիշեցրել էր, որ ՄԱԿ-ի ընդունած 4 բանաձեւերից մեկն էլ հրադադարի ռեժիմի պահպանումն է, որը հարեւան պետությունը խախտում է գրեթե ամեն օր: