Երևանի երեք թատրոններում նախատեսված են ներկայացումների պրեմիերաներ
ԵՐԵՎԱՆ, 31 ՀՈՒԼԻՍԻ, ԱՐՄԵՆՊՐԵՍ: Երևանի երեք թատրոններում հանդիսատեսն աշնանը հնարավորություն կունենա դիտել նոր ներկայացումներ: Նոր բեմադրությունները կիրականացվեն Երևանի քաղաքապետարանի շնորհիվ: Այս մասին լրագրողների հետ զրույցում նշեց Երևանի քաղաքապետի տեղակալ Արամ Սուքիասյանը:
«Երևանյան թատրոններում նկատվում է հանդիսատեսների թվի աճ և մեծ առաջընթաց: Պրեմիերաներ են նախատեսված Մհեր Մկրտչյանի անվան արտիստական, Հրաչյա Ղափլանյանի անվան դրամատիկական և Պատանի հանդիսատեսի թատրոններում»,- «Արմենպրես»-ի փոխանցմամբ՝ նշեց Արամ Սուքիասյանը:
Քաղաքապետի տեղակալն ընդգծեց, որ համապատասխան սուբսիդիայից բացի, թատրոնները քաղաքապետարանից ստացել են որոշակի գումարներ՝ նոր բեմադրությունների համար: «Մենք աշնանը երեք նոր ներկայացում կհանձնենք հանդիսատեսի դատին»,- հավելեց Սուքիասյանը:
Երևանի քաղաքապետի տեղակալը նկատեց, որ լավ կլիներ, եթե Երևանն ունենար լավ ամֆիթատրոն, որտեղ կբեմադրվեին բազմաթիվ ներկայացումներ, սակայն այն ստեղծելու հնարավորություն դեռևս չկա:
«Պետական տոներին հաճախ են օգտագործվում Հանրապետության, Ազատության հրապարակները, Կասկադը: Սակայն հանրության համար ոչ այնքան տեսանելի է բեմահարթակը: Շատ կցանկանայի, որ նման բան լիներ Հայաստանում»,- նշեց նա:
Բաժանորդագրվեք մեր ալիքին Telegram-ում