ԱԻՆ-ը Սյունիքում իրականցնում է իրազեկման ծրագիր
ԿԱՊԱՆ, 26 ՀՈԻԼԻՍԻ, ԱՐՄԵՆՊՐԵՍ: Հայաստանի արտակարգ իրավիճակների նախարարությունը Սյունիքի մարզի 50 համայնքների ներկայացուցիչների համար հուլիսի 22-25-ը Մեղրիի, Կապանի, Գորիսի եւ Սիսիանի տարածաշրջանների թե քաղաքային, եւ թե գյուղական համայնքներում անցկացրել է «Աղետների ռիսկի նվազեցումը եւ լրատվությունը» թեմայով դասընթաց: «Սյունիքում իրականացնում ենք հանրային իրազեկման ծրագիր, որի նպատակը տեղական կարողությունների բարձրացումն է` աղետների ռիսկերի գնահատման գործում»,- «Արմենպրես»-ի հետ զրույցում նշեց ԱԻՆ փրկարարական ծառայության պետի տեղակալ Նիկոլայ Գրիգորյանը:
Նրա խոսքով` պետք է հասնել նրան, որ յուրաքանչյուր համայնք կարողանա գնահատել իր ռիսկերը, դրանք ներառի համայնքի զարգացման ծրագրերում եւ տեղական բյուջեով միջոցներ տրամադրի դրանց նվազեցման համար: Նմանատիպ իրազեկման ծրագիր ավելի վաղ Սյունիքի համայնքներում նախարարությունն իրականացրել է մարզի հրշեջների համար: Դասընթացի ընթացքում ցուցադրվել են տեսաֆիլմեր եւ տեսահոլովակներ` Հայաստանին սպառնացող վտանգների վերաբերյալ:
Դասընթացի մասնակիցներին տրամադրվեց մարզին պատուհասած ու սպառնացող ԱԻ վերաբերյալ հետազոտությունը, որ կատարվել է վերջին 10 տարում: Ըստ հետազոտության, մարզին սպառնացող հավանական վտանգներից են սողանքները, սելավային հոսքերը եւ ջրհեղեղները, քարաթափումներն ու փլուզումները, ձնաբուքը, ցրտահարությունը, կարկուտը, ուժեղ քամին, հրդեհները:
Մարզին բնորոշ է նաեւ կենսաբանական վտանգը` անասունների ու թռչունների շրջանում գրանցվող վարակները: Սյունիքում իրականացվող իրազեկման ծրագրի շրջանակներում նախատեսվում է մարզին բնորոշ աղետներից պաշտպանեվելու համար հրատարակել գրքեր, բրոշյուրներ, օրագրեր` դպրոցականների համար, նկարահանել տեսահոլովակներ եւ ֆիլմեր: Ծրագրի իրականացմանն աջակցում է Շվեյցարիայի զարգացման եւ համագործակցության գործակալությունը:
Գոհար Իսախանյան
Բաժանորդագրվեք մեր ալիքին Telegram-ում