ԱՄՆ-ի իշխանությունները թուլացնում են նավթահումքի արտահանման 40-ամյա արգելքը. Wall Street Journal
ԵՐԵՎԱՆ, 25 ՀՈՒՆԻՍԻ, ԱՐՄԵՆՊՐԵՍ: Բարաք Օբամայի վարչակազմը թուլացնում է ԱՄՆ-ից անմշակ նավթի արտահանման արգելքը, որը գործում էր վերջին 40 տարվա ընթացքում: Այդ մասին, ինչպես տեղեկացնում է «Արմենպրես»-ը, հաղորդել է Wall Street Journal թերթը:
«ԱՄՆ-ի առեւտրի նախարարությունը թույլատրել է Տեխասի նահանգի երկու էներգետիկական ընկերությունների՝ արտահանելու այսպես կոչված գերթեթեւ նավթը, որի պաշարները ԱՄՆ-ում վերջին ժամանակներս աճել են թերթաքարային հանքավայրերի ակտիվ շահագործման հաշվին»,- նշում է հրատարակությունը: Գերթեթեւ նավթը, որը հայտնի է նաեւ որպես խտանյութ, առատորեն առկա է թերթաքարային ապարներում:
ԱՄՆ-ում անմշակ նավթի արտահանման արգելք էր սահմանվել 1973 թվականին ի պատասխան արաբական երկրների կողմից արեւմտյան երկրներին նավթի մատակարարումների արգելանքի: Սակայն ԱՄՆ-ը կարող է արտահանել նավթամթերք, օրինակ, բենզին եւ դիզելային վառելիք:
Ինչպես նշում է հրատարակությունը, Օբամայի վարչակազմի կողմից սահմանվող կանոններին համապատասխան, գերթեթեւ նավթը նվազագույն վերամշակումից հետո կհայտնվի «նավթամթերք» կատեգորիայում եւ, այդպիսով, կթույլատրվի դրա արտահանումը:
«Նավթի մատակարարումները կարող են սկսվել արդեն օգոստոսին: Ամենայն հավանականությամբ սկզբում դրանք կլինեն ոչ մեծ»,- գրում է թերթը: Վաշինգտոնի Բրուքինգսի ինստիտուտի գնահատումների համաձայն՝ ԱՄՆ-ը հաջորդ տարվանից կկարողանա օրական արտահանել մոտավորապես 700 հազար բարել նավթ, հաղորդել է ԻՏԱՌ-ՏԱՍՍ-ը:
Բաժանորդագրվեք մեր ալիքին Telegram-ում