Երիտասարդները, տարեցներն ու նույնիսկ մանկահասակ երեխաները ոգեկոչում են Հայոց ցեղասպանության զոհերի հիշատակը ջահերով երթին
ԵՐԵՎԱՆ, 23 ԱՊՐԻԼԻ, ԱՐՄԵՆՊՐԵՍ: Հայոց ցեղասպանության անմեղ զոհերի հիշատակին նվիրված ամենամյա ջահերով երթը միավորել է ոչ միայն ՀՅԴ երիտասարդական թևի ներկայացուցիչներին, այլև տարբեր քաղաքական հայացքների տեր մարդկանց: Ինչպես հաղորդում է երթին մասնակցող «Արմենպրես»-ի թղթակիցը, միջոցառումը մարդաշատ է, մասնակիցները ժամանակ առ ժամանակ հնչեցնում են «ճանաչում», «հատուցում» կոչերը: Ուրախալի է, որ ջահերով երթին մասնակցում են ոչ միայն երիտասարդները, այլև տարեցներն ու նույնիսկ մանկահասակ երեխաներ` իրենց ծնողների հետ:
Ջահերով երթն ուղեկցվում է հայրենասիրական երգերով: Երթին միանում են նաև իրենց տներում գտնվող քաղաքացիները` վառվող մոմեր դնելով իրենց պատուհանագոգերին:
Այս պահին փակ է Բաղրամյան փողոցի դեպի Բարեկամություն ընթացող գիծը:
ՀՅԴ երիտասարդական միությունը և «Նիկոլ Աղբալյան» ուսանողական միությունն արդեն տասը տարի է կազմակերպում է ջահերով երթը դեպի Ծիծեռնակաբերդ:
Այս օրերին ամբողջ աշխարհում հայկական գաղթօջախներում անցկացվում են հիշատակի միջոցառումներ, որոնք մեկ անգամ ևս միջազգային հանրության ուշադրությունը սևեռում են 20-րդ դարի առաջին ցեղասպանության վրա, որի ժամանակ Օսմանյան կայսրության կողմից իրականացված ջարդերի ժամանակ զոհվեց ու տանջամահ արվեց ավելի քան 1.5 միլիոն հայ:
Բաժանորդագրվեք մեր ալիքին Telegram-ում