Կենտրոնական բանկը Հայաստանի ֆինանսական համակարգը գնահատում է կայուն, ռիսկերը՝ կառավարելի
ԵՐԵՎԱՆ, 18 ԱՊՐԻԼԻ, ԱՐՄԵՆՊՐԵՍ։ Հայաստանի ֆինանսական համակարգը նախորդ տարի շարունակել է ցուցաբերել աճի միտումներ՝ միաժամանակ պահպանելով կայունությունն ու անհրաժեշտ ճկունությունը՝ հնարավոր ռիսկերին դիմակայելու համար։ Այս մասին լրագրողների հետ հանդիպման ժամանակ ասաց ՀՀ ԿԲ Ֆինանսական համակարգի կայունության և զարգացման վարչության պետ Անդրանիկ Գրիգորյանը՝ ներկայացնելով ՀՀ ֆինանսական կայունության հաշվետվությունը։ Նա նշեց, որ մակրոմիջավայրից բխող ռիսկերի շարքում արդիական են համաշխարհային պահանջարկի ցածր մակարդակի պահպանման և աշխարհաքաղաքական հետագա զարգացումների հետ կապված անորոշությունները։«Իրականացված սթրես թեստերի արդյունքներով՝ Հայաստանի բանկային համակարգը բավարար իրացվելի է և կապիտալացված՝ շոկային իրավիճակներում ռիսկերի ազդեցությունը կլանելու համար։ Նախորդ տարվա համեմատ բանկային համակարգի վարկերի աճի տեմպը դանդաղել է, ինչի արդյունքում ավանդների առաջանցիկ միտումների պահպանման պայմաններում էապես ավելացել է բանկային համակարգի իրացվելիությունը։
Հայաստանի բանկային համակարգը պահպանել է նորմատիվային պահանջներից բավական բարձր կապիտալի համարժեքության ու իրացվելիության ցուցանիշներ։ Արձանագրվել է բանկային համակարգի շահութաբերության մակարդակի նվազում, ինչը մասամբ պայմանավորված է տոկոսային սպրեդի (վարկերի և տոկոսադրույքների տարբերություն) նվազմամբ»,- «Արմենպրես»-ի հաղորդմամբ՝ ասաց Գրիգորյանը։
Համաձայն ՀՀ ֆինանսական կայունության հաշվետվության՝ Հայաստանի տնտեսության և ֆինանսական կայունության վրա ազդող հիմնական արտաքին ռիսկերը 2013 թվականի ընթացքում պահպանվել են։ «Համաշխարհային տնտեսության աճի վերականգնումն արագացել է միայն տարվա երկրորդ կեսին՝ հիմնականում պայմանավորված զարգացած երկրների՝ առավելապես ԱՄՆ-ի դրական մակրոտնտեսական զարգացումներով։ Եվրոագոտու երկրներում, ի տարբերություն տարվա առաջին կեսի անբարենպաստ զարգացումներին, տարեվերջին արդեն նկատելի էին տնտեսական անկման հաղթահարման միտումներ։ Զարգացող երկրներում տնտեսակաան աճի դանդաղման միտումը պահպանվել է՝ նպաստելով մի շարք բորսայական ապրանքատեսակների պահանջարկի և գների ցածր մակարդակի պահպանմանը։ Զարգացող և զարգացած երկրների դրամավարկային մարմինները շարունակել են վարել տնտեսական աճի խթանման և վերջինիս հետագա ամրապնդմանն ուղղված քաղաքականություն»,-նշված է հաշվետվության մեջ։
Բաժանորդագրվեք մեր ալիքին Telegram-ում