Մահացել է բանաստեղծ Թաթուլ Բոլորչյանը
ԵՐԵՎԱՆ, 21 ՓԵՏՐՎԱՐԻ, ԱՐՄԵՆՊՐԵՍ: Երկարատև հիվանդությունից հետո փետրվարի 20-ի երեկոյան 83 տարեկանում վախճանվել է ճանաչված ու սիրված բանաստեղծ Թաթուլ Բոլորչյանը: Այս մասին «Արմենպրես»-ին տեղեկացրին բանաստեղծի ընտանիքից: Թաթուլ Բոլորչյանի հոգեհանգիստը տեղի կունենա փետրվարի 22-ին` ժամը 18.00-ից, Քանաքեռի Սուրբ Հակոբ եկեղեցում, հուղարկավորությունը` փետրվարի 23-ին` ժամը 14.00-ին, Հայաստանի գրողների միության շենքից:
Թաթուլ Պողոսի Բոլորչյանը ծնվել է 1931թ. ապրիլի 14-ին, Ախալքալաքի Գումբուրդո գյուղում: 1965 թվականին ավարտել է Երևանի պետական համալսարանի բանասիրական ֆակուլտետը: Արդեն 1960-ական թվականներին նա ճանաչում է ստացել իր բանաստեղծություններով: 1968 թվականից ՀԳՄ անդամ էր: 1966-1974 թթ. աշխատել է «Հայրենիքի ձայն» շաբաթաթերթում, 1985-2003-ին` Խաչատուր Աբովյանի տուն-թանգարանի ավագ գիտաշխատող: 2003-ից աշխատել է ՀՀ արտակարգ իրավիճակների նախարարությանը կից ինստիտուտում: Հեղինակ է 14 բանաստեղծական ժողովածուի:
«Արմենպրես»-ի խմբագրակազմը ցավակցում է բանաստեղծի ընտանիքին, մերձավորներին ու գրչակից ընկերներին:
Բաժանորդագրվեք մեր ալիքին Telegram-ում