ԵՐԵՎԱՆ, 15 ՀՈՒՆՎԱՐԻ, ԱՐՄԵՆՊՐԵՍ: Շախմատի աշխարհի նոր չեմպիոն Մագնուս Կարսլենի համոզմամբ, մարտին կայանալիք հավակնորդների մրցաշարի ֆավորիտները Հայաստանի գրոսմայստեր Լևոն Արոնյանն ու ռուսաստանցի Վլադիմիր Կրամնիկն են:  Այս մասին «Արմենպրես»-ին տված բացառիկ մեկնաբանությամբ ասաց նորվեգացին: «Իմ կարծիքով հավակնորդների մրցաշարի ֆավորիտները Արոնյանն ու Կրամնիկն են, բայց դժվարանում եմ կանխորոշում անել: Ինձ համար, որպես  խաղացողի, ամենակարևորն ինքնազարգացումն է, որպեսզի  մրցակիցներիս համար  լինեմ ամենաբարդ հակառակորդը»,-ասել է նա:

Իսկ աշխարհի նորընծա չեմպիոնը,  ինչպես է իրեն զգում ամենաերիտասարդ թագակրի  տիտղոսով, հարցին Կարլսենը տվեց  անկեղծ ու անմիջական պատասխան. «Ես ինձ հրաշալի եմ զգում, և անչափ ուրախ եմ աշխարհի չեմպիոնի տիտղոսը նվաճելու համար»:

Եղել են դեպքեր, երբ աշխարհի չեմպիոնի տիտղոսը նվաճելուց հետո գրոսմայստերները հաճախ չեն  մասնակցել միջազգային մրցաշարերին, Կարլսենը, սակայն, նախատեսում է շարունակելու  մասնակցությունը մրցաշարարերին, քանզի դրանք և հետաքրքիր են, և  կարևոր իր պատրաստվածությունը պահպանելու համար:

ՖԻԴԵ-ի հավակնորդների մրցաշարն այս տարի կանցկացվի  Ռուսաստանի Խանտի Մանսիյսկ քաղաքում`մարտի 11-ից ապրիլի 1-ը : Մրցաշարի մասնակիցներն են Վիշվանաթան Անանդը (աշխարհի նախկին չեմպիոն), Վլադիմիր Կրամնիկը, Դմիտրի Անդրեյկինը, Վեսելին Տոպալովը, Շախրիյար Մամեդյարովը, Լևոն Արոնյանը, Սերգեյ Կարյակինը և Պետեր Սվիդլերը:

Վարվառա Հայրապետյան, Սյունե Բարսեղյան