Հայերն ավելի երջանիկ են, քան ադրբեջանցիները
ԵՐԵՎԱՆ, 12 ՍԵՊՏԵՄԲԵՐԻ, ԱՐՄԵՆՊՐԵՍ: Հետազոտական ռեսուրսների կովկասյան կենտրոնների հրապարակած` 2011 թվականի ընտրանքային 8-րդ հարցումների արդյունքների համաձայն` հարավկովկասյան երկրներում հանրությանն ամենաշատը հուզող հարցերը շարունակում են մնալ տնտեսական խնդիրները:
«Արմենպրես»-ի հաղորդմամբ` ինչպես նշեց ՀՌԿԿ հայաստանյան կենտրոնի տնօրեն Հեղինե Մանասյանը, Հայաստանում հարցվածները որպես իրենց մտահոգող ամենակարեւոր խնդիր նշել են գործազրկությունը եւ աղքատությունը:
Ադրբեջանում հարցվածները գերակա են համարել նախ տարածքային ամբողջականությունը, ապա միայն գործազրկությունը:
Վրաստանում գործազրկությունը որպես իրենց ամենաշատը մտահոգող խնդիր մատնանշել է հարցվածների 55 տոկոսը, իսկ տարածքային ամբողջականությունը` 12 տոկոսը:
«Ղարաբաղյան հիմնախնդիրների կարգավորման մասին մենք այս տարի առաջին անգամ էինք հարց ուղղում, եւ այն հարցին, թե երբ կլուծվի ԼՂ խնդիրը, «երբեք» կամ «չգիտեմ» են պատասխանել Հայաստանում հարցվածների 62, իսկ Ադրբեջանում` 44 տոկոսը: Վրաստանի հարցվողներին նման հարց չի տրվել»,-ասաց նա:
Մանասյանի խոսքով` հարավկովկասյան երկրներում ընդգծված են մնում միգրացիոն տրամադրությունները:
Հետազոտական ռեսուրսների կովկասյան կենտրոնների հետազոտությունները ցույց են տվել, որ երջանկության միջին մակարդակը Հայաստանում կազմել է 6.6 բալ, Ադրբեջանում` 6.1, իսկ Վրաստանում` 6.9 բալ` 10 բալանոց սանդղակից:
«Կովկասյան բարոմետր»-ը Հետազոտական ռեսուրսների կովկասյան կենտրոնների տարածաշրջանային ամենամյա նախագծերից է, որի նպատակը հարավկովկասյան երկրներում սոցիալական, քաղաքական եւ տնտեսական գործընթացների վերաբերյալ հանրային կարծիքի ուսումնասիրությունն է:
Տվյալների միաժամանակյա հավաքագրւմը Հայաստանի, Վրաստանի եւ Ադրբեջանի տնային տնտեսություններում իրականացվում է 2004 թվականից ի վեր: 2006 թվականից հետազոտություններն ընդգրկում են ինչպես մայրաքաղաքները, այնպես էլ մյուս քաղաքային եւ գյուղական բնակավայրերը:
Բաժանորդագրվեք մեր ալիքին Telegram-ում