ԵՐԵՎԱՆ, 14  ՕԳՈՍՏՈՍԻ, ԱՐՄԵՆՊՐԵՍ: Հայ Հեղափոխական դաշնակցության` արտերկրում գործող երիտասարդական միությունների ֆինանսական միջոցներով այս տարի Հայաստանում եւ Արցախում կազմակերպվել են պատանեկան ճամբարներ:

Ինչպես օգոստոսի 14-ին լրագրողների հետ հանդիպմանը նշեց ՀՅԴ Բյուրոյի Երիտասարդական գրասենյակի պատասխանատու Անահիտ Հարությունյանը,  այս ամառ արդեն ճամբարներ են կազմակերպվել Գյումրիում, Վանաձորում, Սիսիանում, Ստեփանակերտում, Մարտունիում, Քաշաթաղում, որոնց մասնակցել են ավելի քան 1000 պատանիներ: «Մեր այս տարվա ծրագրերը բոլորը ճանաչողական էին: Օրինակ` հունիսին կազմակերպել էինք այց դեպի Արեւմտյան Հայաստան»,-«Արմենպրես»-ի հաղորդմամբ` ասաց Հարությունյանը: ՀՅԴ Բյուրոյի Երիտասարդական գրասենյակի պատասխանատուի խոսքով` ճամբարները երեխաների համար անվճար են, իսկ ֆինանսական միջոցները հոգում են հենց ճամբարի կազմակերպիչ-անդամները:

«Զավարյան» ուսանողական միության անդամ Պերճ Թորոսի գնահատմամբ` կազմակերպված ճամբարները երեխաներին տվեցին այն, ինչ անհրաժեշտ է` թե ուսուցողական, եւ թե ժամանցի առումով:

ՀՅԴ-ի` ԱՄՆ Արեւմտյան շրջանի երիտասարդական միության անդամ Պերճ Բարսեղյանը նշեց, որ Հայաստանի երեխաներն իրենց շատ լավ են ընդունել: «Մենք նրանց անգլերեն ենք սովորեցրել, ուսուցողական գրքեր, շապիկներ ենք նվիրել»,-ասաց նա:

ՀՅԴ երիտասարդական միությունը ՀՅ Դաշնակցության երիտասարդական կազմակերպությունն է, որն աշխատում է Հայաստանում և արտերկրի 17 երկրներում, մասնավորապես, Լիբանանում, ԱՄՆ-ում, Կանադայում, Արգենտինայում, Ֆրանսիայում, Հունաստանում, Ռուսաստանում, Կիպրոսում և այլուր: