ԵՐԵՎԱՆ, 27 ՀՈՒՆՎԱՐԻ, ԱՐՄԵՆՊՐԵՍ: ԱՄՆ-ն Հայոց ցեղասպանության ժխտումը քրեականացնող օրինագծի ընդունման համար առաջին հերթին պետք է ճանաչի Հայոց ցեղասպանությունը: Ինչպես հաղորդում է «Արմենպրես»-ը, հունվարի 27-ին լրագրողների հետ հանդիպման ժամանակ, անդրադառնալով ԱՄՆ-ի հայտարարությանը, թե չի պատրաստվում հետեւել Ֆրանսիայի օրինակին, թուրքագետ Արտակ Շաքարյանը նշեց, որ Հիլարի Քլինթոնը փետրվարին այց է կատարելու Անկարա, եւ դրանով  պատրաստում է  իր այցը: «ԱՄՆ-ն միշտ ջատագով է եղել հայ- թուրքական սահմանների բացմանը, արձանագրությունների վերակենդանացմանը: Սակայն միշտ ունեցել իր դիրքը` չանցնելու Թուրքիայի «կարմիր գիծ»-ը»,-ասաց Շաքարյանը: Նա նշեց, որ ԱՄՆ-ին ձեռնտու չէ, որ սառեցվեն թուրք-ամերիկյան հարաբերությունները, քանի որ ԱՄՆ-ն դուրս է գալիս Իրաքից եւ կարիք ունի Թուրքիայի աջակցությանը: «Թուրք-ամերիկյան հարաբերությունների վատթարացում դեմոկրատներին պետք չէ` հաշվի առնելով նաեւ նախագահական ընտրությունները»,-ասաց թուրքագետը:

Դիտվել է 810 անգամ