ԵՐԵՎԱՆ, 16 ՀՈՒՆՎԱՐԻ, ԱՐՄԵՆՊՐԵՍ: «Կրթությունն առանց սահմանների» կարգախոսի շրջանակում հունվարի 16-ին քանդվեց Երեւանի ճարտարապետության եւ շինարարության ու Հայաստանի պետական ճարտարագիտական համալսարանները միմյանցից տարիներ շարունակ անջատող խորհրդանշական պատը: Պատը կառուցվել էր 1989 թվականին, երբ ժամանակի հրամայականով ձեւավորվեցին երկու առանձին համալսարաններ: Այդ քայլից հետո լիարժեք չի լուծվել ուսումնակրթական բազաների հավասար տեղաբաշխման հարցը, որն էլ լուծելու նպատակով երկու բուհերի ռեկտորները, առանց կոմերցիոն պայմանների, երկկողմ կշահագործեն երկու բուհերի ուսումնալաբորատոր, սպորտային եւ այլ բազաները: Ինչպես հաղորդում է «Արմենպրես»-ը, խորհրդանշական միջոցառմանը մասնակցեց նաեւ ՀՀ կրթության եւ գիտության նախարար Արմեն Աշոտյանը: Նրա խոսքով ` հայաստանյան բուհերը ոչ թե իրարից առանձնանալու, այլ իրար հետ շփվելու, համագործակցելու կարիք ունեն, եւ նմանատիպ խոչընդոտների ստեղծումը ոչ մեկին պատիվ չի բերում: «Պատերը պետք է քանդվեն, իսկ բաժանող գծերը` մաքրվեն»,- կարեւորեց Արմեն Աշոտյանը: 

Այսուհետ երկու կառույցների ուսանողներին հնարավորություն կընձեռվի ոչ միայն լիարժեք օգտագործել երկու համալսարանների ուսումնագիտական, սպորտային դահլիճը, ընթերցասրահը, ճաշարանը, այլեւ` կսերտացնի երկու բուհերի ուսումնադասախոսական կազմի հետ շփումը, որը կնպաստի երկոկղմ գիտակրթական մտքի զարգացմանը: