ერევანში საერთაშორისო ფორუმი „ერევნის დიალოგი“ დაიწყო

ერევანში საერთაშორისო ფორუმი „ერევნის დიალოგი“ დაიწყო.

„არმენპრესის“ ცნობით, კონფერენციის დღის წესრიგი მოიცავს მთელ რიგ გლობალურ და რეგიონულ საკვანძო თემებს: ხელოვნური ინტელექტით და დემოკრატიული მდგრადობით დაწყებული, ენერგეტიკული უსაფრთხოებითა და სამხრეთ კავკასიის ეკონომიკური პერსპექტივებით დასრულებული.

ფორუმის ფარგლებში დაგეგმილ პანელურ დისკუსიებზე ყურადღება გამახვილდება სამხრეთ კავკასიაში მშვიდობისა და უსაფრთხოების საკითხებზე, ასევე რეგიონის როლზე გლობალურ ეკონომიკურ და ლოგისტიკურ პროცესებში. განიხილება სომხეთის შესაძლებლობები, იმოქმედოს როგორც დამაკავშირებელმა რგოლმა ევროპასა და ცენტრალურ აზიას შორის.

ცალკეულ პანელებზე იმსჯელებენ სამხრეთ კავკასიის ეკონომიკურ და საინვესტიციო პოტენციალზე, მათ შორის სომხეთის შესაძლებლობებზე კრიტიკული ნედლეულის, ნახევარგამტარებისა და ტექნოლოგიურ სექტორებში.

კონფერენციის ფარგლებში დაგეგმილია პანელური დისკუსია, რომელიც მიეძღვნება დემოკრატიულ მდგრადობას, ჰიბრიდულ საფრთხეებსა და ხელოვნური ინტელექტის გავლენას საარჩევნო პროცესებზე. განიხილება, თუ როგორ მოქმედებს ახალი ტექნოლოგიები საინფორმაციო გარემოზე, საზოგადოებრივ ნდობასა და ამომრჩეველთა ქცევაზე. დღის წესრიგში ასევე შეტანილია აზიისა და წყნარი ოკეანის რეგიონის სტრატეგიულ ავტონომიასთან დაკავშირებული საკითხები და დისკუსიები ქვეყნების სტრატეგიული არჩევანის შესახებ მრავალპოლარულ მსოფლიო წესრიგში.

ასევე იმსჯელებენ ხელოვნური ინტელექტის რეგულირებისა და ტექნოლოგიური სუვერენიტეტის საკითხებზე, ისევე როგორც ენერგეტიკულ უსაფრთხოებასა და „მწვანე“ ენერგეტიკაზე გადასვლის დაფინანსებაზე.

ფორუმის დღის წესრიგი ასევე მოიცავს რეგიონული უსაფრთხოების ახალ მიდგომებსა და რეგიონული თანამშრომლობის როლს საერთაშორისო სისტემის ტრანსფორმაციის პირობებში.

საერთაშორისო ფორუმში „ერევნის დიალოგი“ მონაწილეობას მიიღებენ ექსპერტები და საერთაშორისო ორგანიზაციების წარმომადგენლები, რათა განიხილონ გლობალური გამოწვევები და რეგიონული თანამშრომლობის პერსპექტივები.

კონფერენციის გახსნაზე სიტყვით გამოვლენ სომხეთის პრემიერ-მინისტრი ნიკოლ ფაშინიანი, საფრანგეთის პრეზიდენტი ემანუელ მაკრონი, სომხეთის საგარეო საქმეთა მინისტრი არარატ მირზოიანი და ევროპის საბჭოს გენერალური მდივანი ალენ ბერსე.