ფაშინიანი ახალი კონსტიტუციის მიღების პროცესისთვის ვადამდელი საპარლამენტო არჩევნების ჩატარებას არ გამორიცხავს

სომხეთის პრემიერ-მინისტრი ნიკოლ ფაშინიანი არ გამორიცხავს, რომ ახალი კონსტიტუციის მისაღებად ვადამდელი საპარლამენტო არჩევნები ჩატარდეს, თუკი პროცესი სხვა გზით ვერ მოხერხდება.

„უახლოეს მომავალში ჩვენ გამოვაქვეყნებთ ახალი კონსტიტუციის პროექტს, დავიწყებთ განხილვებს და პარლამენტს გადავუგზავნით. ასევე შევეცდებით ოპოზიციონერი კოლეგები დავარწმუნოთ, რომ ეს მეტად მნიშვნელოვანი და პრინციპული საკითხია, ეს სომხეთის სახელმწიფოს მარადიულობის განსაზღვრისა და გადაწყვეტის საკითხია. შევეცდებით დავარწმუნოთ, არ გამოვა? მაშინ სხვა სცენარებით წავალთ, მათ შორის, შეგვიძლია ვადამდელი არჩევნებიც ჩავატაროთ, და ვინ თქვა, რომ მსგავსი სცენარი გამორიცხულია?“ - „არმენპრესის“ ცნობით, მთავრობის სხდომის შემდეგ ჟურნალისტებთან ბრიფინგზე განაცხადა ფაშინიანმა.

პრემიერ-მინისტრმა აღნიშნა, რომ სომხეთის კონსტიტუციის საკითხი აზერბაიჯანთან არ განიხილება.

„ეს ჩვენი შიდაპოლიტიკური დღის წესრიგია. ასევე უნდა ვთქვა, რომ ამ თემაზე საუბარი ბიშკეკში ჩვენი შეხვედრის დროსაც გაიმართა. მე აზერბაიჯანულ მხარესაც ვუთხარი, რომ ჩვენთვის მიუღებელია, როდესაც აზერბაიჯანიდან გამუდმებით ისმის ჩვენს კონსტიტუციასთან დაკავშირებული საკითხები, რადგან ეს ჩვენი შიდაპოლიტიკური დღის წესრიგია. აზერბაიჯანული მხარის პოზიცია ასეთია: მათ განაცხადეს, რომ აღიარებენ, რომ კონსტიტუცია სომხეთის შიდა საქმეა და არავის აქვს უფლება ჩაერიოს ქვეყნების შიდა ცხოვრებაში, უბრალოდ, რადგან სამშვიდობო შეთანხმებასთან დაკავშირებულ საკითხს განვიხილავთ, ისინი გვატყობინებენ, რომ მათ ასეთი პოლიტიკური პოზიცია აქვთ“, - აღნიშნა პრემიერ-მინისტრმა.