არარატ მირზოიანი TRIPP-სა და ევრაზიული ეკონომიკური კავშირის რეგულაციებს შორის წინააღმდეგობას ვერ ხედავს
3 წუთი კითხვის
სომხეთის ევრაზიულ ეკონომიკურ კავშირში (EAEU) წევრობა არ გამორიცხავს მეზობელ ქვეყნებთან სავაჭრო-ეკონომიკური ურთიერთობების განვითარებას.
„არმენპრესის“ ცნობით, ამის შესახებ სომხეთის საგარეო საქმეთა და საერთაშორისო ვაჭრობის მინისტრმა არარატ მირზოიანმა განაცხადა. მან უპასუხა ფრაქცია „ძლიერი სომხეთის“ დეპუტატის, სიუზანა ავეტისიანის კითხვას იმის შესახებ, რამდენად შეესაბამება TRIPP-ის სასაზღვრო და საბაჟო რეგულაციები ევრაზიული ეკონომიკური კავშირის წესებს.
სომხეთის საგარეო საქმეთა და საერთაშორისო ვაჭრობის მინისტრმა განაცხადა, რომ TRIPP-ის პროექტსა და ევრაზიული ეკონომიკური კავშირის მოქმედ რეგულაციებს შორის წინააღმდეგობას ვერ ხედავს.
დეპუტატი ასევე დაინტერესდა, რა ბედი ელის პროექტს იმ შემთხვევაში, თუ ევრაზიული ეკონომიკური კავშირი მომავალში მესამე ქვეყნების ტვირთების ტრანზიტის წესებს შეცვლის.
„სანამ ჩვენ ევრაზიული ეკონომიკური კავშირის წევრები ვართ, ეს რეგულაციები ჩვენზეც ვრცელდება. თუმცა, როგორც ჩანს, ევრაზიული ეკონომიკური კავშირის ყველა წევრს თავის მეზობლებთან სავაჭრო-ეკონომიკური ურთიერთობები აქვს“, – აღნიშნა მირზოიანმა.
მინისტრმა ხაზი გაუსვა, რომ მოქმედ რეგულაციებს შორის წინააღმდეგობას ვერ ხედავს, ხოლო მათი შესაძლო ცვლილებების შედეგების განხილვა მას შემდეგ შესთავაზა, რაც ასეთი ცვლილებები განხორციელდება.
საკომუნიკაციო გზების გახსნის ეკონომიკურ მნიშვნელობაზე საუბრისას მირზოიანმა სომხეთისთვის ახალი ბაზრების ხელმისაწვდომობისა და ქვეყნის შიგნით სატრანსპორტო კავშირების გაფართოების შესაძლებლობას გაუსვა ხაზი.
„ჩვენ გვინდა, აზერბაიჯანის გავლით ცენტრალურ აზიაში, ჩინეთში ჩავიდეთ და იქიდან ტვირთი ჩამოვიტანოთ. გვინდა, ნახიჩევანის გავლით ირანს დავუკავშირდეთ. ეს გვჭირდება თუ არა? თუ ამ კითხვაზე პასუხი დადებითია, მაშინ ყველაფერი, საკითხი აქ ამოიწურება“, – განაცხადა მან.
მოსაზრებაზე პასუხად, რომ პროექტით მიღებული სარგებელი აზერბაიჯანისთვის უფრო დიდია, მინისტრმა აღნიშნა, რომ აზერბაიჯანიც დაინტერესებულია სომხეთის ტერიტორიის გავლით ნახიჩევანთან, თურქეთთან და სხვა მიმართულებებთან სატრანსპორტო კავშირით. მირზოიანის თქმით, სომხეთისთვის პრიორიტეტულია, რომ სატრანსპორტო კომუნიკაციების გახსნა ქვეყნისთვის მომგებიანი იყოს.
21 ოქტომბერს სომხეთის პარლამენტის საგარეო ურთიერთობათა მუდმივ კომიტეტში განიხილავენ სომხეთსა და აშშ-ს შორის TRIPP-ის პროექტთან დაკავშირებით სტრატეგიული პარტნიორობის შესახებ ჩარჩო შეთანხმების რატიფიცირების პროექტს.