ლატვიის პრეზიდენტი მაღალ შეფასებას აძლევს სომხეთისა და აზერბაიჯანის მიერ მშვიდობისკენ გადადგმულ ნაბიჯებს

ლატვიის პრეზიდენტი ედგარს რინკევიჩსი მაღალ შეფასებას აძლევს სომხეთსა და აზერბაიჯანს შორის მშვიდობის შესახებ პარაფირებულ შეთანხმებას და იმედოვნებს, რომ ეს პროცესი ორ ქვეყანას შორის ურთიერთობების ნორმალიზებასა და რეგიონულ სტაბილურობას შეუწყობს ხელს.

„არმენპრესის“ ინფორმაციით, ამის შესახებ ლატვიის პრეზიდენტმა სომხეთის რესპუბლიკის პრეზიდენტ ვაჰაგნ ხაჩატურიანთან ერთად გამართული ერთობლივი განცხადებების დროს განაცხადა.

მან აღნიშნა, რომ მისი ვიზიტის მთავარი მიზანია სომხეთის მხარდაჭერა მიმდინარე რეფორმების პროცესში და ევროკავშირთან ურთიერთობების გაღრმავების საქმეში.

ედგარს რინკევიჩსი თავის გამოსვლაში სომხეთსა და აზერბაიჯანს შორის ურთიერთობების მოწესრიგების საკითხსაც შეეხო და ხაზგასმით აღნიშნა, რომ ლატვია მხარს უჭერს და მაღალ შეფასებას აძლევს ერევნისა და ბაქოს მიერ მშვიდობისკენ გადადგმულ ნაბიჯებს.

„ჩვენ მაღალ შეფასებას ვაძლევთ სამშვიდობო შეთანხმებას, რომლის მიმართულებითაც სომხეთი და აზერბაიჯანი ნაბიჯებს დგამენ. შესაბამისად, ვიმედოვნებ, რომ ეს პროცესი გამოიწვევს ორ ქვეყანას შორის ვითარების ნორმალიზებას, ასევე უზრუნველყოფს მეტ სტაბილურობასა და უსაფრთხოებას ფართო რეგიონში“, - განაცხადა ლატვიის პრეზიდენტმა.

მან აღნიშნა, რომ ლატვია სომხეთს სამხრეთ კავკასიაში ძალიან მნიშვნელოვან პარტნიორად განიხილავს. ედგარს რინკევიჩსმა ხაზგასმით აღნიშნა, რომ პოლიტიკური ურთიერთობების გარდა, ერევანმა და რიგამ ნაბიჯები უნდა გადადგან ეკონომიკური თანამშრომლობის სტიმულირებისთვისაც.

ლატვიის პრეზიდენტმა რწმენა გამოთქვა, რომ მისი ვიზიტი ხელს შეუწყობს სომხეთთან თანამშრომლობის შემდგომ გაღრმავებას. მან ასევე დადებითად შეაფასა ორ ქვეყანას შორის არსებული საპარლამენტო კავშირების დონე.

„ლატვია მაღალ შეფასებას აძლევს სომხეთის არჩევანს ევროპულ გზაზე. ამ გზაზე ჩვენ დაგეხმარებით შეძლებისდაგვარად და მოუთმენლად ველით პრაქტიკული თანამშრომლობის ახალი გზების მოძიებას“, - აღნიშნა ედგარს რინკევიჩსმა.