სომხეთის წინააღმდეგ ჰიბრიდული თავდასხმები რუსული, თურქული და აზერბაიჯანული მედიიდან მომდინარეობს - დეპუტატი

საპარლამენტო ფრაქცია „სამოქალაქო შეთანხმების“ დეპუტატმა, ლილით მინასიანმა განაცხადა, რომ სომხეთის წინააღმდეგ ჰიბრიდული ჩარევები სხვადასხვა ქვეყნის მედიაპლატფორმებზე ვლინდება, ძირითადად კი - რუსულ, თურქულ და აზერბაიჯანულ წყაროებში.

„არმენპრესის“ ცნობით, საპარლამენტო ბრიფინგზე გამოსვლისას მინასიანმა ოპოზიციის იმ ბრალდებებს უპასუხა, თითქოს ხელისუფლება თავს არიდებს ჰიბრიდული ჩარევების წყარო ქვეყნების დასახელებას. დეპუტატმა აღნიშნა, რომ აუცილებელია თავად ჰიბრიდული თავდასხმის ბუნების სწორად გააზრება.

„პირველ რიგში, ჩვენს ოპოზიციონერებს მოვუწოდებ, გაერკვიონ, თუ რას ნიშნავს ჰიბრიდული თავდასხმა და მხოლოდ ამის შემდეგ გააკეთონ მკვეთრი განცხადებები“, - აღნიშნა მან.

დეპუტატის განმარტებით, ჰიბრიდული თავდასხმები გულისხმობს გარე ჩარევას, რომელიც სხვადასხვა მიმართულებით, მათ შორის საინფორმაციო სივრცეში შეიძლება განხორციელდეს.

„გარე ჩარევის თვალსაზრისით, ქვეყნების ჩამონათვალი ვრცელია და ამის გამოვლინებებს ჩვენ სრულიად ღიად და მკაფიოდ ვხედავთ როგორც რუსულ, ისე თურქულ და აზერბაიჯანულ პრესაში“, - განაცხადა მინასიანმა.

მან ხაზგასმით აღნიშნა, რომ მსგავსი ჩარევები ხშირად ყალბი ინფორმაციის გავრცელებით გამოიხატება, რაც მიზნად ისახავს პრემიერ-მინისტრისა და ხელისუფლების დისკრედიტაციას.

„პუბლიკაციები ვრცელდება სხვადასხვა ანონიმურ საიტზე ან ცნობილი გამოცემების სახეცვლილი სახელწოდებების მქონე პლატფორმებზე, რათა მოქალაქეები შეცდომაში შეიყვანონ“, - თქვა დეპუტატმა.

მინასიანის თქმით, ხელისუფლება ცდილობს ოპერატიულად მოახდინოს რეაგირება მსგავს პუბლიკაციებზე და უარყოს ყალბი ცნობები მანამ, სანამ ისინი ფართოდ გავრცელდება. მან მედიასაშუალებებსაც მოუწოდა, თვალი ადევნონ ოფიციალურ განმარტებებს და მხარი დაუჭირონ დეზინფორმაციასთან ბრძოლას.

„ჩვენ პროაქტიულად ვმუშაობთ ამ ინფორმაციის უარყოფაზე და მოვუწოდებ მედიასაშუალებებს, თვალი ადევნონ ამ განცხადებებს და ხელი შეუწყონ მათ გავრცელებას“, - დასძინა მან.