სომხეთ-თურქეთის სახმელეთო საზღვრის გახსნა თურქეთის გადაწყვეტილებაზეა დამოკიდებული, სომხური მხრიდან არანაირი დაბრკოლება არ არსებობს - ნიკოლ ფაშინიანი

სომხეთის პრემიერ-მინისტრი დარწმუნებულია, რომ ძალიან მალე სომხეთსა და თურქეთს შორის სახმელეთო საზღვრის გახსნის საკითხში გარკვეული პროგრესი იქნება.

„არმენპრესის“ ინფორმაციით, ამის შესახებ ნიკოლ ფაშინიანმა პოლონეთის საერთაშორისო ურთიერთობების ინსტიტუტში პოლონეთში აკრედიტებულ უცხოელ ელჩებთან, დიპლომატებთან და ანალიტიკური ცენტრების წარმომადგენლებთან შეხვედრისას განაცხადა. მან უპასუხა დისკუსიის ერთ-ერთი მონაწილის კითხვას სომხეთსა და თურქეთს შორის ურთიერთობების მოწესრიგების პროცესთან დაკავშირებით.

„ჩვენ გვაქვს ძალიან პოზიტიური დიალოგი თურქეთთან, მუდმივად ვმართავთ შეხვედრებსა და კონსულტაციებს, თუმცა, რა თქმა უნდა, ყველაზე მნიშვნელოვანი მოვლენა, რომლის ხილვის იმედიც გვაქვს, სომხეთსა და თურქეთს შორის დიპლომატიური ურთიერთობების დამყარება და, რა თქმა უნდა, სახმელეთო საზღვრის გახსნაა. რატომ ვახსენებ სწორედ სახმელეთო საზღვარს? იმიტომ, რომ საჰაერო საზღვარი გახსნილია და ჩვენ გვაქვს რეგულარული ფრენები სომხეთიდან თურქეთში. ჩემი მოლოდინია, რომ ორმხრივი ფრენების მოცულობა გაიზრდება, თუმცა, ბუნებრივია, ვიმედოვნებთ, რომ სახმელეთო საზღვარიც გაიხსნება. სხვათა შორის, თურქეთთან საზღვარზე ახალი ინფრასტრუქტურა დაგვჭირდება და ახლა განვიხილავთ, თუ როგორ შეუძლია ევროკავშირს ამ საკითხში დახმარება. პროცესი ვითარდება და მჯერა, რომ ძალიან მალე გარკვეულ შედეგს ვიხილავთ“, - განაცხადა ფაშინიანმა.

მან დასძინა, რომ რჩება შთაბეჭდილება, თითქოს არსებობს საერთო გაგება იმისა, რომ საზღვრის გახსნა უნდა მოხდეს, თუმცა ეს თურქეთის გადაწყვეტილებაზეა დამოკიდებული.

„სომხური მხრიდან არანაირი დაბრკოლება არ არსებობს, ჩვენ მზად ვართ ეს ნებისმიერ დროს გავაკეთოთ. ბოლო თვეების განმავლობაში რამდენჯერმე განვაცხადეთ, რომ ასევე მზად ვართ უზრუნველვყოთ გზა თურქეთიდან აზერბაიჯანისკენ და აზერბაიჯანიდან თურქეთისკენ მიმავალი სატვირთო ავტომანქანებისთვის. ინფრასტრუქტურა ამისთვის სრულად მზადაა და ჩვენ თურქეთის გადაწყვეტილებას ველოდებით“, - ხაზგასმით აღნიშნა ნიკოლ ფაშინიანმა.