სომხეთის რესპუბლიკის საგარეო საქმეთა სამინისტრომ ვლადიმირ სოლოვიოვის განცხადებებთან დაკავშირებით რუსეთის ელჩს საპროტესტო ნოტა გადასცა
2 წუთი კითხვის
სომხეთში რუსეთის ფედერაციის ელჩი სერგეი კოპირკინი დაიბარეს სომხეთის რესპუბლიკის საგარეო საქმეთა სამინისტროში, სადაც მას გადაეცა საპროტესტო ნოტა, რომელშიც ღრმა აღშფოთებაა გამოხატული ვლადიმირ სოლოვიოვის განცხადებებთან დაკავშირებით․
ამის შესახებ „არმენპრესთან“ საუბარში სომხეთის რესპუბლიკის საგარეო საქმეთა სამინისტროს პრესსპიკერმა ანი ბადალიანმა განაცხადა.
„სომხეთში რუსეთის ფედერაციის ელჩი დაიბარეს საგარეო საქმეთა სამინისტროში და მას გადაეცა საპროტესტო ნოტა, რომელშიც ღრმა აღშფოთებაა გამოხატული სახელმწიფო მედია-ჰოლდინგის შემადგენლობაში შემავალი გადაცემის ეთერში გაკეთებულ განცხადებებთან დაკავშირებით. ხაზგასმულია, რომ აღნიშნული განცხადებები წარმოადგენს სომხეთის რესპუბლიკის სუვერენიტეტის წინააღმდეგ დაუშვებელ ხელყოფას და მტრულ გამოვლინებას და უხეშად არღვევს სომხეთსა და რუსეთს შორის მეგობრული ურთიერთობების ფუნდამენტურ პრინციპებს“, - აღნიშნა სომხეთის რესპუბლიკის საგარეო საქმეთა სამინისტროს პრესსპიკერმა.
რუსმა ტელეწამყვანმა და ჟურნალისტმა ვლადიმირ სოლოვიოვმა ადრე განაცხადა, რომ „სომხეთის დაკარგვა არ შეესაბამება რუსეთის ინტერესებს და რუსეთმა სპეციალური სამხედრო ოპერაცია უნდა განახორციელოს არა მხოლოდ უკრაინაში, არამედ რუსეთის გავლენის ზონად მიჩნეულ სხვა ტერიტორიებზეც - საერთაშორისო სამართლის უგულებელყოფით“.