ასტანა იმედს გამოთქვამს, რომ ერევანი და ბაქო რაც შეიძლება მალე მოაწერენ ხელს სამშვიდობო ხელშეკრულებას: ტოკაევი
2 წუთი კითხვის
ყაზახეთის პრეზიდენტმა კასიმ-ჟომარტ ტოკაევმა იმედი გამოთქვა, რომ სომხეთი და აზერბაიჯანი რაც შეიძლება მალე მოაწერენ ხელს სამშვიდობო შეთანხმებას.
„არმენპრესის“ ინფორმაციით, ამის შესახებ ყაზახეთის პრეზიდენტმა განაცხადა აშხაბადში მიმდინარე კონფერენციაზე „მშვიდობისა და ნდობის საერთაშორისო წლის 2025“ ფარგლებში.
„ჩვენი აზრით, სომხეთისა და აზერბაიჯანის მიერ მშვიდობის შესახებ ერთობლივი დეკლარაციის ხელმოწერა ისტორიული მნიშვნელობის მოვლენაა, რომელიც ფართო პერსპექტივებს ქმნის ამ რეგიონში და მის ფარგლებს გარეთ მრავალმხრივი თანამშრომლობისთვის. ვიმედოვნებთ, რომ სომხეთსა და აზერბაიჯანს შორის სამშვიდობო ხელშეკრულება რაც შეიძლება მალე გაფორმდება“, – განაცხადა ტოკაევმა.
ყაზახეთის პრეზიდენტის თქმით, ერევანსა და ბაქოს შორის საბოლოო და ყოვლისმომცველი სამშვიდობო შეთანხმების ხელმოწერა უზრუნველყოფს სტაბილურობას სამხრეთ კავკასიის რეგიონში.
შეგახსენებთ, რომ სომხეთის პრეზიდენტი ვაჰაგან ხაჩატურიანი ასევე სამუშაო ვიზიტით იმყოფება აშხაბადში, თურქმენეთის პრეზიდენტის მოწვევით, თურქმენეთის მუდმივი ნეიტრალიტეტის 30 წლის იუბილესადმი მიძღვნილ ღონისძიებებში მონაწილეობის მიზნით.
აშშ-ის დედაქალაქ ვაშინგტონში, 8 აგვისტოს, სომხეთისა და აზერბაიჯანის საგარეო საქმეთა მინისტრებმა – არარატ მირზოიანმა და ჯეიჰუნ ბაირამოვმა, სომხეთის, აზერბაიჯანისა და აშშ-ის ლიდერების თანდასწრებით, ხელი მოაწერეს წინასწარ შეთანხმებას „სომხეთის რესპუბლიკასა და აზერბაიჯანის რესპუბლიკას შორის მშვიდობისა და სახელმწიფოთაშორისი ურთიერთობების დამყარების შესახებ“, რომლის დებულებები შეთანხმებული იყო 2025 წლის მარტში.