რაც უფრო ხელსაყრელი იქნება გარემო სომხეთსა და აზერბაიჯანს შორის, მით უფრო ადვილად გადაწყდება ტყვეთა საკითხი: ფაშინიანი
2 წუთი კითხვის
სომხეთის მთავრობა ყოველდღიურად მუშაობს აზერბაიჯანში დაკავებული სომეხი ტყვეების დაბრუნების მიმართულებით.
როგორც „არმენპრესი“ იუწყება, ამის შესახებ ჟურნალისტებთან საუბარში სომხეთის პრემიერ-მინისტრმა ნიკოლ ფაშინიანმა განაცხადა.
„რაც შეეხება ჩვენს თანამემამულეებს, რომლებიც იმყოფებიან ტყვეობაში ან თავისუფლებაწართმეულნი არიან, ჩვენ ყოველდღიურად ვმუშაობთ ამ მიმართულებით. თუ არსებობს მოსაზრება, რომ ეს საკითხი უნდა გადაწყდეს, რათა მშვიდობის საკითხიც მოგვარდეს, მე ვამბობ, რაც უფრო ხელსაყრელი იქნება გარემო სომხეთსა და აზერბაიჯანს შორის, მით უფრო მარტივად გადაწყდება ეს საკითხიც. ეს, უბრალოდ, ხედვის საკითხია“, - აღნიშნა პრემიერ-მინისტრმა.
ფაშინიანის აზრით, მშვიდობა გადაწყვეტს ყველა დანარჩენ პრობლემასაც.
„წარმოდგენა, თითქოს უნდა გადავჭრათ ყველა საკითხი და შემდეგ დავდოთ მშვიდობის ხელშეკრულება, მცდარია. ეს ცოცხალი პროცესი არის. რომ ამ ლოგიკით გვემოძრავა, მშვიდობის ამ ეტაპს ვერ მივაღწევდით“, - განაცხადა მან.
პრემიერ-მინისტრის თქმით, სწორედ ამიტომ ცდილობს მთავრობა აჩვენოს მაქსიმალურად მოქნილი მიდგომა, რომელიც კონკრეტულ მომენტში სრულად შეესაბამება სომხეთის სახელმწიფო ინტერესებს.
აზერბაიჯანი ოფიციალურად ადასტურებს 23 სომეხი ტყვის არსებობას, მათ შორის, მთიანი ყარაბაღის ყოფილი სამხედრო-პოლიტიკური ხელმძღვანელობის წარმომადგენლებს.