მირზოიანის აზრით, მნიშვნელოვანია სომხეთისა და აზერბაიჯანის საზოგადოებებს შორის კონტაქტების გააქტიურება
2 წუთი კითხვის
სომხეთის რესპუბლიკის საგარეო საქმეთა მინისტრი არარატ მირზოიანი მიიჩნევს, რომ მშვიდობის განმტკიცებისთვის აუცილებელია სომხეთისა და აზერბაიჯანის საზოგადოებებს შორის ურთიერთობების გაძლიერება.
როგორც „არმენპრესი“ იუწყება, მირზოიანმა ამის შესახებ განაცხადა საერთაშორისო ფორუმზე „ორბელი ფორუმი: მშვიდობისა და მრავალმხრივი თანამშრომლობის მშენებლობა“.
„როდესაც ვსაუბრობთ დამყარებულ მშვიდობაზე, უნდა გვესმოდეს, რომ ძირითადი პრინციპები უკვე შეთანხმებულია, სამშვიდობო შეთანხმება წინასწარ არის ხელმოწერილი, თუმცა რჩება საკითხები, რომლებიც ჯერ კიდევ საჭიროებს დარეგულირებას. ამ საკითხთაგან ერთ-ერთი სწორედ ორ საზოგადოებას შორის კავშირების დამყარებაა. უნდა ვაღიაროთ, რომ შერიგებას დრო სჭირდება არსებობს შერიგების საჭიროება, მაგრამ საზოგადოების სრულ შერიგებას აფერხებს ფსიქოლოგიური ღრმა ტრავმები და იარები, რომლებიც ჯერ კიდევ ძალიან ახალია. მათი გადალახვა დროის და ძალისხმევის საკითხია“, - განაცხადა მირზოიანმა.
მინისტრმა აღნიშნა, რომ ამ კონტექსტში დიდი ყურადღება ექცევა სამოქალაქო საზოგადოების წარმომადგენელთა ურთიერთვიზიტებს.
„რამდენიმე კვირის წინ სომხეთში გაიმართა შეხვედრები სამოქალაქო საზოგადოების წარმომადგენლებს შორის. ამ დარბაზში გვყავს ექსპერტებიც აზერბაიჯანიდან. მსგავს ღონისძიებები უნდა გაიმართოს აზერბაიჯანში, სადაც სომხეთის წარმომადგენლებიც უნდა მონაწილეობდნენ. ეს არის გზა საზოგადოებებს შორის დიალოგის გასაღრმავებლად“, - აღნიშნა მირზოიანმა.