გერმანია მხარს უჭერს სამხრეთ კავკასიაში მშვიდობისკენ მიმართულ ვაშინგტონის ნაბიჯებს։ კლაუდია ბუში

გერმანიის მთავრობა მზად არის მხარი დაუჭიროს 8 აგვისტოს ვაშინგტონში სომხეთსა და აზერბაიჯანს შორის მიღწეულ შეთანხმებებს․

„არმენპრესის“ ცნობით, ამის შესახებ სიუნიქის რეგიონში ჟურნალისტებთან საუბრისას განაცხადა სომხეთში გერმანიის ელჩმა კლაუდია ბუშმა, როდესაც ის შეეხო ვაშინგტონში სომხეთსა და აზერბაიჯანს შორის ხელმოწერილ დოკუმენტებს.

ელჩის თქმით, გერმანიის მთავრობას აქტიური მონაწილეობა ჰქონდა სომხეთსა და აზერბაიჯანს შორის მოლაპარაკებებში.

„ჩვენ ბერლინში შეხვედრები მოვაწყვეთ, ვმუშაობდით ინტენსიურად, და როგორც სომხეთის, ისე აზერბაიჯანის ხელმძღვანელობა მადლიერია ჩვენი ჩართულობისთვის. ახლა საჭიროა მომავალზე ყურება და იმის გააზრება, რა უნდა იყოს შემდეგი ნაბიჯები. ვაშინგტონში განხორციელებულ ნაბიჯებში ჩვენ ვხედავთ პროგრესს. გერმანიის მთავრობა მზად არის მხარი დაუჭიროს ამ ნაბიჯებს. ეს გრძელვადიანი გზა იქნება, მაგრამ უკვე ჩანს, რომ გარკვეული პერიოდის განმავლობაში სიმშვიდეა, არ გვინახავს შეტაკებები, რაც იმედს იძლევა, რომ შეგვიძლია ამ გზით გაგრძელება“, - განაცხადა ელჩმა.

სომხეთის პრემიერ-მინისტრმა ნიკოლ ფაშინიანმა, აზერბაიჯანის პრეზიდენტმა ილჰამ ალიევმა და აშშ-ის პრეზიდენტმა დონალდ ტრამპმა 8 აგვისტოს ვაშინგტონში ხელი მოაწერეს დეკლარაციას. დეკლარაციამდე სომხეთისა და აზერბაიჯანის საგარეო საქმეთა მინისტრებმა წინასწარ მოაწერეს ხელი მშვიდობის ხელშეკრულებას და ერთობლივი წერილით მიმართეს ეუთოს მინსკის ჯგუფის დაშლის საკითხზე. იმავე დღეს სომხეთმა ასევე მოაწერა ხელი ორმხრივ მემორანდუმებს თანამშრომლობის შესახებ შეერთებულ შტატებთან.