საგარეო საქმეთა სამინისტრომ ფაშინიან-ალიევის შეხვედრის შესახებ დეტალები გაავრცელა

სომხეთის რესპუბლიკის საგარეო საქმეთა სამინისტრომ დეტალური ინფორმაცია გამოაქვეყნა აბუ დაბიში სომხეთის პრემიერ-მინისტრ ნიკოლ ფაშინიანისა და აზერბაიჯანის პრეზიდენტ ილჰამ ალიევის შეხვედრის შესახებ.

„არმენპრესის“ მიერ გავრცელებული ინფორმაციით, წარმოდგენილია სომხეთის საგარეო საქმეთა სამინისტროს განცხადება.

„2025 წლის 10 ივლისს სომხეთის რესპუბლიკის პრემიერ-მინისტრი და აზერბაიჯანის რესპუბლიკის პრეზიდენტი შეხვდნენ აბუ დაბიში (არაბთა გაერთიანებული საამიროები) და განიხილეს სომხეთ-აზერბაიჯანის შორის სახელმწიფოთაშორისი ურთიერთობების დარეგულირების დღის წესრიგის სხვადასხვა ასპექტი.

მხარეებმა დაადასტურეს, რომ ურთიერთობების დარეგულირების პროცესზე ორიენტირებული საკითხების განხილვისთვის ორმხრივი მოლაპარაკებები ყველაზე ეფექტიანი ფორმატია, რის საფუძველზეც მიღწეულია შეთანხმება შედეგზე ორიენტირებული დიალოგის გაგრძელების თაობაზე.

ქვეყნების ლიდერებმა, ხაზგასმით აღნიშნეს დელიმიტაციის პროცესში მიღწეული პროგრესი და დაავალეს შესაბამის სახელმწიფო კომისიებს გააგრძელონ პრაქტიკული მუშაობა აღნიშნული მიმართულებით.

მხარეები ასევე შეთანხმდნენ, რომ გააგრძელებენ ორმხრივ მოლაპარაკებებს და ნდობის განმტკიცების ღონისძიებებს.

სომხეთის რესპუბლიკის პრემიერ-მინისტრმა და აზერბაიჯანის რესპუბლიკის პრეზიდენტმა მადლობა გადაუხადეს არაბთა გაერთიანებული საამიროების პრეზიდენტს, შეიხ მუჰამედ ბინ ზაიედ ალ ნაჰიანს, თბილი მასპინძლობისა და ორმხრივი შეხვედრის ორგანიზებისთვის“.