ფაშინიანი ხელოვნური ინტელექტის ქარხნის მშენებლობას სომხეთისთვის ყველაზე მნიშვნელოვან ტექნოლოგიურ ინვესტიციად მიიჩნევს

სომხეთის პრემიერ-მინისტრი ნიკოლ ფაშინიანი შეეხო სომხეთში ხელოვნური ინტელექტის ქარხნის მშენებლობის პროექტს და აღნიშნა, რომ ეს არის სომხეთში ყველაზე დიდი და მნიშვნელოვანი ტექნოლოგიური ინვესტიცია.

„არმენპრესი“-ს ინფორმაციით, ამის შესახებ ნიკოლ ფაშინიანმა დაწერა X-ის საკუთარ მიკრობლოგზე.

@FirebirdCloudAI is the largest and most important tech investment — the “Stargate” of Armenia 🇦🇲

The idea was sparked when Jensen Huang visited Yerevan in 2023. Today, it becomes reality: an #AI Factory with thousands of #Blackwell GPUs, driving innovation across Armenia. https://t.co/2ULV4wcYSC

— Nikol Pashinyan (@NikolPashinyan) June 12, 2025

„FirebirdCloudAI ეს არის სომხეთის ყველაზე დიდი და მნიშვნელოვანი ტექნოლოგიური ინვესტიცია, სომხეთის „ვარსკვლავური კარიბჭე“. იდეა დაიბადა მას შემდეგ, რაც ჯენსენ ჰუანგი (NVIDIA-ს დამფუძნებელი და აღმასრულებელი დირექტორი) 2023 წელს ეწვია ერევანს. დღეს ეს ხდება რეალობა - ათასობით Blackwell გრაფიკული პროცესორით აღჭურვილი ხელოვნური ინტელექტის ქარხანა ხელს შეუწყობს ინოვაციების განვითარებას სომხეთის მთელ ტერიტორიაზე“, - წერს ფაშინიანი.

სომხეთის მაღალი ტექნოლოგიების მრეწველობის მინისტრმა მხითარ ჰაირაპეტიანმა 12 ივნისს განაცხადა, რომ სომხეთში დაგეგმილია 500 მილიონი დოლარის ინვესტიციით ხელოვნური ინტელექტის მსხვილი ქარხნის მშენებლობა. მინისტრის თქმით, ეს არის Firebird-ის, სომხეთის მთავრობისა და NVIDIA-ს ერთობლივი პროექტი.