სომხეთი არ დაექვემდებარება პროვოკაციებს და არ გადაუხვევს მშვიდობის დღის წესრიგიდან: დეპუტატის კომენტარი აზერბაიჯანის სროლებზე

სომხეთის ეროვნული ასამბლეის „სამოქალაქო შეთანხმების“ ფრაქციის მდივანი არტურ ჰოვჰანისიანი მიიჩნევს, რომ აზერბაიჯანი, სროლებით სიუნიქის ოლქის მშვიდობიანი დასახლებების მიმართულებით, ცდილობს სომხეთი დააშოროს მშვიდობის დღის წესრიგს. დეპუტატი აღნიშნავს, რომ სომხეთი პროვოკაციებზე არ წამოეგება და არ გადაუხვევს თავისი დღის წესრიგიდან.

„არმენპრესის“ ცნობით, ამის შესახებ დეპუტატმა ისაუბრა საპარლამენტო ბრიფინგზე.

ბოლო დღეებში ხოზნავარის მიმართულებით აზერბაიჯანული სროლების შესახებ საუბრისას, დეპუტატმა აღნიშნა, რომ სომხეთმა არაერთხელ დააფიქსირა თავისი ოფიციალური პოზიცია. სომხეთი რეაგირებს ყველა ინციდენტზე, რომელიც ხდება ქვეყნის საზღვრის მონაკვეთებზე.

„მშვიდობის დღის წესრიგით ვაგრძელებთ სვლას. ჩვენ აზერბაიჯანს შევთავაზეთ ორმხრივად განიხილოს საზღვრის მონაკვეთი, შეისწავლოს კონკრეტული ინციდენტები და დაადგინოს, რომელი მხარე იწვევს მათ და როგორ ხდება ეს. ამ მიმართულებით ვაგრძელებთ მუშაობას. და სომხეთის რესპუბლიკა არ დაექვემდებარება პროვოკაციებს და არ გადაუხვევს მშვიდობის დღის წესრიგიდან. ჩვენ მივდივართ მშვიდობის დღის წესრიგით და გვაქვს საერთაშორისო საზოგადოების მხარდაჭერა ამ დღის წესრიგის მიმართ“, – განაცხადა ჰოვჰანისიანმა.

30 მაისსაც, 00:10-დან 01:00 საათამდე, აზერბაიჯანის შეიარაღებული ძალების ქვედანაყოფებმა ცეცხლი გაუხსნეს სიუნიქის ოლქის ხოზნავარის მიმართულებით, რის შედეგადაც დაზიანდა საცხოვრებელი სახლის სველი წერტილი და დაიღუპა ერთი წვრილრქოსანი პირუტყვი.

29 მაისსაც, აზერბაიჯანულმა სამხედროებმა ცეცხლი გახსნეს ხოზნავარის მიმართულებით, რის შედეგადაც დაზიანდა საცხოვრებელი სახლი. ამის შემდეგ, სომხეთის თავდაცვის მინისტრმა სურენ პაპიკიანმა, პარლამენტში ჟურნალისტებთან საუბრისას განაცხადა, რომ აზერბაიჯანი უარყოფს ხოზნავარის მიმართულებით სროლაში მონაწილეობას.