სომხეთი და კვიპროსი თანამშრომლობის სტრატეგიული პარტნიორობის დონემდე აყვანას გეგმავენ

სომხეთმა კვიპროსს თანამშრომლობის დონის სტრატეგიული პარტნიორობის დონემდე აყვანა შესთავაზა, ხოლო კვიპროსის წარმომადგენელთა პალატის თავმჯდომარემ, ანიტა დიმიტრიუმ, თავის მხრივ, პოზიტიურად მიუდგა ამ წინადადებას.

„არმენპრესის“ ინფორმაციით, ამის შესახებ სომხეთის ეროვნული ასამბლეის თავმჯდომარე ალენ სიმონიანმა ანიტა დიმიტრიუსთან ერთობლივ პრესკონფერენციაზე განაცხადა.

სიმონიანის თქმით, დიმიტრიუსთან შეხვედრისას განიხილეს ორმხრივი ურთიერთობების სხვადასხვა საკითხები.

„ჩვენს მიერ გამოთქმული იყო ინიციატივა თანამშრომლობის დონის სტრატეგიულ პარტნიორობამდე ამაღლების შესახებ, და ქალბატონმა დიმიტრიუმ ამ წინადადებას დადებითი რეაქცია მისცა“, – განაცხადა სიმონიანმა.

მხარეებმა ასევე განიხილეს ორ ქვეყანას შორის თანამშრომლობა სხვადასხვა საერთაშორისო პლატფორმებზე.

ეროვნული ასამბლეის თავმჯდომარემ ხაზი გაუსვა, რომ დიმიტრიუ სომხეთის ერთ-ერთი ყველაზე გამოჩენილი და თვალსაჩინო მეგობარია საერთაშორისო პლატფორმებზე.

„იმ საერთაშორისო ტრიბუნებზე, სადაც ჩემი კოლეგა მონაწილეობს, სომხეთს ორი მიკროფონი აქვს, რის გამოც ქალბატონ დიმიტრიუს და ჩვენს მეგობარ კვიპროსს დიდი მადლობა მინდა გადავუხადო. სომხეთი ყოველთვის დგას კვიპროსისა და კვიპროსელი ხალხის გვერდით“, – დაარწმუნა სიმონიანმა.