ფაშინიან-პუტინ-ალიევის სამმხრივი შეხვედრა 9 მაისს არ იგეგმება. ნაზელი ბაღდასარიანი

სომხეთის პრემიერ-მინისტრის პრესსპიკერმა ნაზელი ბაღდასარიანმა უარყო მედიაში გავრცელებული ინფორმაცია, თითქოს 9 მაისს მოსკოვში დაგეგმილია სამმხრივი შეხვედრა სომხეთის პრემიერ-მინისტრ ნიკოლ ფაშინიანის, რუსეთის პრეზიდენტ ვლადიმირ პუტინისა და აზერბაიჯანის პრეზიდენტ ილჰამ ალიევის მონაწილეობით.

„9 მაისს ფაშინიანი-პუტინი-ალიევის სამმხრივი ფორმატით შეხვედრა არ არის დაგეგმილი“, – განაცხადა ნაზელი ბაღდასარიანმა „არმენპრესთან“ საუბრისას, მედიის მიერ უფრო ადრე გავრცელებული ინფორმაციის კომენტირებისას, რომლის თანახმადაც, მოსკოვის წითელ მოედანზე დაგეგმილ ყოველწლიურ აღლუმამდე, რუსეთის პრეზიდენტი ვლადიმირ პუტინი გეგმავდა შეხვედრას სომხეთის პრემიერ-მინისტრ ნიკოლ ფაშინიანთან და აზერბაიჯანის პრეზიდენტ ილჰამ ალიევთან.

შეგახსენებთ, რომ სომხეთის პრემიერ-მინისტრმა ნიკოლ ფაშინიანმა 14 მარტს რუსეთის პრეზიდენტ ვლადიმირ პუტინთან სატელეფონო საუბრის დროს დაადასტურა, რომ იღებს რუსეთის პრეზიდენტის მოწვევას და 9 მაისს მოსკოვში დაგეგმილ საზეიმო ღონისძიებებში მონაწილეობას მიიღებს.