რუბენ ვარდანიანმა ბაქოს ციხიდან ნამდვილი და ხანგრძლივი მშვიდობისკენ მოუწოდა

რუბენ ვარდანიანმა ბაქოს ციხიდან ოჯახის მეშვეობით აუდიომიმართვა გაავრცელა სატელეფონო საუბრის დროს სთხოვა, რომ მისი ხმა ჩაეწერათ და საჯაროდ გაევრცელებინათ. როგორც „არმენპრესი“ იუწყება რუბენ ვარდანიანის ოფისის მიერ გავრცელებულ განცხადებაზე დაყრდნობით, აუდიომიმართვაში მან, კერძოდ, მშვიდობისკენ მოუწოდა, რომელიც ადამიანის ფუნდამენტურ ღირებულებებსა და ღირსებაზეა დაფუძნებული։

„დღეს 5 მარტია. მინდა ორიოდე სიტყვა გითხრათ, როგორც რუბენ ვარდანიანი, ისეთი, როგორიც ვარ: სომხური სულის მქონე, რუსულენოვანი მოაზროვნე და მოსაუბრე, მსოფლიოს მოქალაქე, ბედნიერი ჩემი ცოლთან ერთად, ყველას მოყვარული, თვითგანათლებული და ღმერთში მორწმუნე.

უპირველეს ყოვლისა, მინდა ყველას მადლობა გადაგიხადოთ, რომ ფიქრით, ლოცვებითა და წერილებით მხარს მიჭერთ, არ რჩებით გულგრილი აქ მიმდინარე მოვლენების მიმართ. მე ამას ვგრძნობ და ეს ძალას მაძლევს. აზრი მატერიალურია. კარგად ვარ, მტკიცედ ვდგავარ, ჯანმრთელობა ნორმაში მაქვს, მშვიდად ვარ ჩემს თავთან და სულიერად ძლიერი ვარ, როგორც არასდროს.

მინდა ბოდიში მოვუხადო ჩემს საყვარელ მეუღლეს, ჩემს ოჯახს, ყველა ნათესავსა და ახლობელს, რომ ამ ჩემი გადაწყვეტილებით მათ ტკივილი და წუხილი მივაყენე. მაგრამ თქვენ იცით, რომ თითოეულ ჩვენგანს თავისი გზა აქვს, და მე ეს გზა ავირჩიე. ჩვენი ბედი ღმერთის მიერ არის განსაზღვრული, მაგრამ გზებს ყოველთვის თავად ვირჩევთ. და თუ ჩვენ ჩვენს არჩევანზე უარს ვიტყვით, მაშინ მას ყოველთვის სხვა გააკეთებს ჩვენი ნაცვლად.

კიდევ ერთხელ მსურს ხაზი გავუსვა, რომ ჩემი ეს გადაწყვეტილება არანაირად არ არის დაკავშირებული პირადად ჩემთან, ჩემს მდგომარეობასთან ან იზოლაციაში ყოფნის პირობებთან, ისევე როგორც მაშინ, როდესაც 20 დღის განმავლობაში, 24 აპრილამდე, ღამის 12 საათზე შიმშილობა გამოვაცხადე. ეს არის პროტესტი პროცესის წინააღმდეგ, იმ წინააღმდეგ, თუ როგორ მიმდინარეობს ეს სასამართლო პროცესი.

მე ვიცოდი, რისკენაც მივდიოდი, მზად ვიყავი და ვარ კიდევ უფრო რთული პირობებისთვისაც. არ ვარ მსხვერპლი, არ მჭირდება თანაგრძნობა, რადგან ეს არის გააზრებული გადაწყვეტილება.

ჩემი მოთხოვნები იგივე რჩება: თუ მსჯით, გაასამართლეთ პროფესიონალურად, ღიად და საჯაროდ, აზერბაიჯანის ყველა კანონისა და პროცედურის შესაბამისად, სხვებთან ერთად, საერთაშორისო მედიისა და დამკვირვებლების თანდასწრებით, თუ დარწმუნებული ხართ თქვენს სიმართლეში. ნუ გამოყოფთ ჩემს საქმეს ცალკე. რატომ გამოეყო ჩემი საქმე, როდესაც ყველა ბრალდება ეფუძნება იმ მოსაზრებას, რომ ორგანიზებული კრიმინალური ჯგუფის წევრი ვარ, რომლის წევრობაც [19]87 წლიდან მეკისრება?

ნუ დაარღვევთ თქვენს საკუთარ კანონებსა და პროცედურებს. ნუ გააყალბებთ დოკუმენტებს, ნუ შეცვლით ოქმებს. თქვენ ხომ ყველაფერი გაქვთ, ჩემი ყველა გაჯეტი, ყველა დოკუმენტი. ნუ აქცევთ სასამართლოს ფორმალურ პროცესად, იმიტაციად, შოუდ. თუ მსჯით, გაასამართლეთ სამართლიანად.

ჩემს ყველა თანამემამულეს, საყვარელ და ახლობელ ადამიანებს მინდა ვუთხრა შემდეგი: აქ ასამართლებენ არა მხოლოდ მე და იმ 15 ადამიანს, არამედ ყველა სომეხს. და თუ ამას ვერ ხვდებით, ეს დიდი ტრაგედიაა, რადგან ეს არ არის ისტორიისა და კონფლიქტის დასასრული, არამედ მხოლოდ მორიგი ეტაპი, რაც სამწუხაროა ყველა მხარისთვის.

ბრალს მაყენებენ ყველაფერში, რაც მოხდა [19]87 წლიდან. პრობლემა არ არის, მზად ვარ ამისთვის უმძიმესი სასჯელი მივიღო, ოღონდ ეს დაეხმაროს მშვიდობისა და სიმშვიდის დამყარებას. მაგრამ ილუზიაა, რომ ამის შემდეგ ყველამ მშვიდად გააგრძელოს ცხოვრება, თითქოს ეს საკითხები არ არსებობს და მათთან შეხება აღარ მოუწევთ.

როდესაც გადავედი არცახში, ვიცოდი, რის წინაშე ვდგებოდი. ყველა ადამიანი ცხოვრებაში მხოლოდ საკუთარი თავისთვის მოქმედებს, საკუთარ თავზე იღებს პასუხს ღმერთის წინაშე თავისი აზრების, სიტყვებისა და ქმედებებისთვის. მე ამაში ღრმად ვარ დარწმუნებული. და თუ ვინმე თავს სწირავს სამშობლოს, ოჯახს ან პრინციპებს, ეს მხოლოდ მისი პირადი გადაწყვეტილებაა და მისი პასუხისმგებლობა. ამ თვალსაზრისით, მე ყველაფერი გააზრებულად გავაკეთე.

არ ვიცი, მექნება თუ არა თქვენთან კომუნიკაციის შესაძლებლობა, ამიტომ მინდა ბოდიში მოვუხადო ყველას, ვისაც ოდესმე სიტყვით, ქმედებით ან უყურადღებობით ვაწყენინე. მაპატიეთ. ეს არ გამიკეთებია ბოროტი განზრახვით, შურით, ამპარტავნებით ან შურისძიების სურვილით. არ მინდოდა არავისთვის ტკივილის მიყენება.

განსაკუთრებით მინდა ვახსენო ერთი ადამიანი, ვის მიმართაც დანაშაულის გრძნობა ჩემთვის ყველაზე მძიმეა- ალვარდი. თუ მე და თქვენი მეუღლე მანქანაში არ ვიქნებოდით, ის ახლა თქვენ გვერდით იქნებოდა. გთხოვთ, მაპატიეთ. ჩემთვის ეს ყველაზე მძიმე სასჯელია, რადგან ჩემი მიზეზით კიდევ ერთი ადამიანი იტანჯება ჩვენთან ერთად.

ასევე, მინდა ცალკე ბოდიში მოვუხადო ყველა იმ ბავშვს, რომელიც თავისი სამშობლოს გარეშე დარჩა, რომ ვერ შევძელი გამეკეთებინა ყველაფერი, რაც შემეძლო და რაც უნდა გამეკეთებინა, რომ ეს არ მომხდარიყო. გავაკეთე იმდენი, რამდენიც მორალურ უფლებად მივიჩნიე, რადგან თქვენთან ვიყავი. მიხარია, რომ შევძელი შემეჩერებინა გარკვეული მოვლენები, რომლებიც, ჩემი აზრით… ჩემი აზრით, საბოლოოდ გაგვანადგურებდა როგორც ერს. ეს შევაჩერე და მცირედით შევცვალე ისტორიის მიმდინარეობა.

ბედნიერი ვიყავი, რომ თქვენთან ერთად ვიყავი, არცახის ხალხთან, იმ მძიმე დღეებში. მთელი ამ დროის განმავლობაში ვგრძნობდი თქვენს სიყვარულს, ნდობას, სითბოსა და მადლიერებას. თქვენით ვამაყობ ჩემი გულწრფელი და უბრალო ხალხით, და ყველას მიყვარხართ.

ბედნიერი ადამიანი ვარ. ღმერთმა საოცარი ოჯახი და მეგობრები მაჩუქა. უზარმაზარი რაოდენობის პროექტები განვახორციელე ჩემს უნიკალურ პარტნიორებთან ერთად. ბევრი რამ ვიხილე ამქვეყნად. მაგრამ, ყველა სირთულის, ბლოკადის, მომავლის გაურკვევლობისა და მძიმე პირობების მიუხედავად, ეს მაინც ჩემი ცხოვრების საუკეთესო დღეები იყო ერთად აღვადგენდით ჰაკობავანკს, ერთად ვჭამდით პურს და ვცეკვავდით ჩვენს ცეკვებს.

ბედნიერი ვარ, რომ მრავალი მეგობრისა და პარტნიორის დახმარებით, რამდენიმე ათეული პროექტი განვახორციელე არცახში. მათ შორის, განსაკუთრებული მადლობა მინდა გადავუხადო ჩემს მუსლიმ მეგობარს (სახელს არ დავასახელებ, რომ პრობლემები არ შეექმნას) შუშის მეჩეთის ერთად აღდგენისთვის.

დაიმახსოვრეთ: ბოროტებას ბოროტებით ვერ უპასუხებ ის ამით უფრო ძლიერდება და იზრდება. სუმგაითის შემდეგ მოხდა ხოჯალუ, შემდეგ კი ისევ და ისევ… ეს გზა ჩემთვის ყოველთვის მიუღებელი იყო, რადგან მას მომავალი არ აქვს ეს მხოლოდ ჩიხია, რომელსაც, სამწუხაროდ, კარგი დასასრული არ აქვს.

ასევე, მინდა მადლობა გადავუხადო იმ მრავალ აზერბაიჯანელს, ვისთანაც აქ შეხება მქონდა, ადამიანური ღირებულებებისადმი მათი ერთგულებისთვის მაშინაც კი, როდესაც მე მტრად მხედავენ და გულში სიძულვილი აქვთ დაგროვილი. მათ შეძლეს, ადამიანობა შეენარჩუნებინათ. ხოლო მათ, ვინც სხვაგვარად მოიქცა, გულწრფელად ვწუხვარ და ვპატიობ, ისევე როგორც იმ სომხებს, რომლებიც სომხეთში ჩემსა და ჩემს ოჯახს იმავე დამოკიდებულებით ეპყრობიან.

მე ოპტიმისტი ვარ და მჯერა, რომ ამ ყველაფრის მიუხედავად, ყველა გამოწვევასა და სირთულეს გადავლახავთ და კვლავ ვიცხოვრებთ ჩვენს სამშობლოში მეზობლებთან მშვიდობიანად, ერთმანეთის პატივისცემით. მჯერა, რომ ურთიერთმტრობასა და დაგროვილ სიძულვილს დავძლევთ, ისევე როგორც ეს ზოგიერთმა ხალხმა უკვე შეძლო.

მაგრამ თუ ამას მართლა გვინდა მივაღწიოთ, გვჭირდება ნამდვილი, გრძელვადიანი მშვიდობა არა მხოლოდ ქაღალდზე ხელმოწერილი, არამედ რეალურად განხორციელებული. უნდა გვახსოვდეს, რომ ჩვენ არავინ არაფერს გვმართებს. მხოლოდ ძლიერ ხალხთან, ღირსების მქონე ქვეყანასთან, რომელიც ელიტით, ღირსებითა და პატივით არის აღჭურვილი, შეიძლება რეალური შეთანხმებების მიღწევა.

ეს დიდი პასუხისმგებლობაა იმ ელიტისთვის, რომელიც ელიტა მხოლოდ იმიტომ კი არ არის, რომ ფული, კავშირები, ძალაუფლება ან ინტელექტი აქვს, არამედ იმიტომ, რომ ესმის: ვისაც მეტი ეძლევა, მისგან მეტი მოითხოვება. ნამდვილი ელიტისთვის პირადი ინტერესები ყოველთვის საზოგადოების წინაშე არსებულ ვალდებულებაზე შემდგომია, ხოლო ერისა და ქვეყნის მომავლის წინაშე პასუხისმგებლობა ყოველთვის უნდა ჭარბობდეს პირად სარგებელსა და სურვილებს.

და ბოლოს, ამ საშინელი კონფლიქტის ყველა მსხვერპლის ხსოვნის პატივსაცემად. ღრმად ვარ დარწმუნებული, რომ არსებობს რაღაცები, რომლებიც ერთ ადამიანის სიცოცხლეზე მნიშვნელოვანია: ეს არის სიკეთის, სინათლის, ღირებულებების, სიწმინდისა და სულიერი საწყისებისადმი რწმენის შენარჩუნების აუცილებლობა, რაც ადამიანს რობოტისგან განასხვავებს. რადგან ამის გარეშე მსოფლიო ქაოსში ჩაიძირება, ან წყალდიდობებში და სხვა კატასტროფებში განადგურდება. ოქროს ხბოს მონა არ უნდა გავხდეთ. ეს ყველაფერი კაცობრიობის ისტორიაში უკვე მომხდარა. მოდით, აღარ გავიმეოროთ და ამისთვის ყველა ძალისხმევა გამოვიჩინოთ, რადგან სწორედ ღირებულებების რწმენა არის ჩვენი მომავლის საფუძველი.

ამიტომ, ამ ფუნდამენტური ღირებულებების, საყრდენებისა და გზავნილების დასაცავად, რომლებიც ჩემთვის უმნიშვნელოვანესია, მზად ვარ, საკუთარ თავთან ჰარმონიაში, ბოლომდე გავატარო ეს გზა და სრულიად ბედნიერი ვიყო. რადგან ბედნიერება იწყება და სრულდება შენს შიგნით, როდესაც საკუთარ თავთან ჰარმონიაში ხარ.

მოხარული ვარ, რომ ჩემს ხალხს ვემსახურები და იმ პრინციპებს, რომლებიც, ჩემი აზრით, მხოლოდ სომხებისთვის კი არა, არამედ მთელი კაცობრიობისთვის მნიშვნელოვანია.

და ბოლოს… აქ მივხვდი, რომ არასდროს უნდა მიეცე სასოწარკვეთას და გულგრილობას, და გავაცნობიერე, რატომ არის ეს შვიდი მთავარ ცოდვათაგან ყველაზე საშინელი. ადრე ვფიქრობდი, რომ შური ან ამპარტავნება უფრო უარესი იყო. მაგრამ სასოწარკვეთა და გულგრილობა ნიშნავს, რომ შენში ღმერთის ნაპერწკალი ჩაქრა, რომ რწმენა დაკარგე, რომ უბრალოდ ხელები ასწიე და დანებდი. გთხოვთ, ამას არასოდეს მოიმოქმედოთ!

მსურს, რომ არასოდეს დავკარგოთ იმედი და არ ჩავვარდეთ სასოწარკვეთაში. გთხოვთ. ეს ჩვენი მომავლის საფუძველია, ამიტომ ვაფასებ იმ შანსს, რომელიც მომეცა. გავაკეთებ ყველაფერს, რაც შემიძლია, და გავაგრძელებ იმის კეთებას, რისი გაკეთებაც შემიძლია.

ყველას მიყვარხართ. დარწმუნებული ვარ, რომ ყველაფერი კარგად იქნება. ყოველთვის ვიყავი, ვარ და ვიქნები თქვენთან! მე ადამიანი ვარ, რომელსაც სურს იცხოვროს, უყვარდეს და თავისი საქმე გააგრძელოს. მაგრამ მიმაჩნია, რომ რასაც ვაკეთებ, სწორია, რადგან ეს ერთადერთი გზაა, რომ გაგიყვანოთ იმ გულგრილობიდან, რომელშიც იმყოფებით.

დარწმუნებული ვარ, რომ ყველა სირთულის მიუხედავად, რაც ჩვენს წინაშე დგას, მათ დავძლევთ. თქვენთან ერთად ვარ, როგორც რუბენ ვარდანიანი, კარლენის შვილი, ჰამო ვარდანიანის შვილიშვილი, ჩემი მთელი მემკვიდრეობითმშობლებისა და არცახელი ბებიის მემკვიდრეობით. გმადლობთ, რომ მომეცით ბედნიერება, ვიყო სომეხი და მიყვარდეს ჩემი სამშობლო“, - ნათქვამია შეტყობინებაში.