ფაშინიანი სომხეთ-აზერბაიჯანის ურთიერთობებში ესკალაციის საფუძველს ვერ ხედავს

ერევანი, 4 დეკემბერი, არმენპრესი. სომხეთის პრემიერ-მინისტრი ნიკოლ ფაშინიანი იმედს გამოთქვამს, რომ სომხეთი და აზერბაიჯანი გაააქტიურებენ მუშაობას მშვიდობის ხელშეკრულების პროექტზე. მისი თქმით, სამუშაოს 90 პროცენტი შესრულებულია, დარჩენილია მხოლოდ საბოლოო ძალისხმევა და ხელშეკრულების ხელმოწერა.

როგორც „არმენპრესი“ იტყობინება, პრემიერ-მინისტრმა ამის შესახებ განაცხადა პარლამენტში მთავრობის წევრებთან კითხვების და პასუხების სესიაზე.

აზერბაიჯანულ მედიაში გამოქვეყნებულ სტატიებზე საუბრისას, რომლებიც ამტკიცებენ, თითქოს სომხეთი ახალ ომს ამზადებს აზერბაიჯანის წინააღმდეგ, ფაშინიანმა აღნიშნა, რომ ამ სტატიების მთავარი თეზისი არის, თითქოს სომხეთს და პირადად პრემიერ-მინისტრს შიდა პოლიტიკურ მიზეზების გამო სჭირდებათ ომის დაწყება აზერბაიჯანის წინააღმდეგ.

„თუმცა, ნებისმიერ დამკვირვებელს შეუძლია დაინახოს, რომ პირიქით – სწორედ შიდა პოლიტიკური მიზეზების გამო, ხელისუფლებას და კონკრეტულად მე, ხელს გვაწყობს რეგიონში სტაბილური ვითარება“, – განაცხადა ფაშინიანმა.

პრემიერმა აღნიშნა, რომ აღნიშნული სტატიები აჩვენებს, რომ არიან ძალები, რომლებიც დაინტერესებულნი არიან რეგიონში ვითარების დესტაბილიზაციით. ფაშინიანის თქმით, სომხეთის პასუხი უნდა იყოს პროვოკაციებისგან თავის შეკავება და საკუთარი პოზიციის დაუღალავი განმარტება.

„ჩვენ არ გვაქვს აზერბაიჯანზე თავდასხმის არანაირი მიზეზი, რადგან პოლიტიკური დონეზე ჩვენ უკვე გადავდგით სამართლებრივი ნაბიჯი და ურთიერთშეთანხმებით ვაღიარეთ ერთმანეთის ტერიტორიული მთლიანობა ალმა-ათის დეკლარაციის საფუძველზე“, – აღნიშნა ფაშინიანმა.

მან ასევე აღნიშნა, რომ სომხეთის პარლამენტმა დაამტკიცა სომხეთ-აზერბაიჯანის სახელმწიფო საზღვრის დელიმიტაციის კომისიების რეგლამენტი და უახლოეს პერიოდში დელიმიტაციის პროცესის დაწყებაა დაგეგმილი. „გამორიცხულია, რომ სომხეთის მხრიდან რაიმე ქმედება იყოს მიმართული რეგიონში სიტუაციის დესტაბილიზაციისკენ“, – განაცხადა ფაშინიანმა.

პრემიერმა შეახსენა 2021 და 2022 წლებში სომხეთის წინააღმდეგ განხორციელებული აგრესიის ფაქტები და იმ ტერიტორიების ოკუპაცია, რომლებიც სომხეთის 200 კვ.კმ-ზე მეტს მოიცავს. „თუმცა, ასევე განვაცხადეთ და კვლავ ვაცხადებთ, რომ ამ ტერიტორიების საკითხის სამხედრო გზით გადაწყვეტა ჩვენი დღის წესრიგში არ არის და არ იქნება. დელიმიტაციის კომისიების რეგულაციის დამტკიცება და დელიმიტაციის პროცესი გვაძლევს შესაძლებლობას, მოლაპარაკებების და სამართლებრივი საფუძვლის ფარგლებში ყველა ეს საკითხი გადავწყვიტოთ“, – განაცხადა მან.

ფაშინიანმა დაადასტურა, რომ სომხეთი ერთგულია მშვიდობის დღის წესრიგის მიმართ და სამხედრო გეგმები არცერთი მეზობლის მიმართ არ აქვს. „მე იმედი მაქვს, რომ ჩვენ გავააქტიურებთ მუშაობას მშვიდობის ხელშეკრულების პროექტზე, რადგან სამუშაოს 90 პროცენტი შესრულებულია. დარჩენილია ბოლო ძალისხმევა და ხელშეკრულების ხელმოწერა. ჩვენ ასევე შემოგთავაზეთ ძალიან რეალური და პრაგმატული გადაწყვეტილება რეგიონში კომუნიკაციების გახსნის საკითხზე. დარჩენილია მხოლოდ ნაბიჯების გადადგმა და ამ ყველაფრის გადაწყვეტა. ჩემი შეფასებით, რეგიონში სომხეთ-აზერბაიჯანის ურთიერთობებში ესკალაციის არანაირი საფუძველი არ არსებობს“, – დაასრულა ფაშინიანმა.