Պատմաբանն աննախադեպ է համարում ԱՄՆ Ներկայացուցիչների պալատի բանաձևի ընդունումը

ԵՐԵՎԱՆ, 31 ՀՈԿՏԵՄԲԵՐԻ, ԱՐՄԵՆՊՐԵՍ: Երևանի պետական համալսարանի պատմության ֆակուլտետի դեկան, պատմաբան Էդիկ Մինասյանն աննախադեպ է համարում Ամերիկայի Միացյալ Նահանգների Կոնգրեսի Ներկայացուցիչների պալատի կողմից Հայոց ցեղասպանության վերաբերյալ բանաձևի ընդունումը: «Արմենպրես»-ի փոխանցմամբ` այս մասին Մինասյանն ասաց հոկտեմբերի 31-ին հրավիրված մամուլի ասուլիսում:

«Եղել են մի շարք դեպքեր, երբ ԱՄՆ Ներկայացուցիչների պալատում հարցը չի քննարկվել նախագահների անմիջական միջամտության արդյունքում: Այս անգամ Թրամփը չմիջամտեց, դա նշանակում է, որ նախապես քաղաքական համաձայնություն է եղել, ինչի արդյունքում հանրապետականները դեմոկրատների հետ համաձայնեցված քվեարկեցին»,- ասաց Մինասյանը:

Պատմաբանը ողջունում է նաև այն հանգամանքը, որ ԱՄՆ Ներկայացուցիչների պալատն այդ որոշումն ընդունեց Թուրքիայի Հանրապետության օրը` հոկտեմբերի 29-ին:

ԱՄՆ Կոնգրեսի Ներկայացուցիչների պալատում հոկտեմբերի 29-ին կայացած քվեարկության արդյունքում ձայների մեծամասնությամբ ընդունվել է Հայոց ցեղասպանությունը ճանաչող բանաձևը։ Քվեարկությանը մասնակցած կոնգրեսականներից կողմ է քվեարկել 405-ը, դեմ՝ 11-ը: