Եվրանեսթ խորհրդարանական վեհաժողովում Հայաստանի պատվիրակությունը կղեկավարի Գայանե Աբրահամյանը
1 րոպեի ընթերցում
ԵՐԵՎԱՆ, 13 ՀՈՒԼԻՍԻ, ԱՐՄԵՆՊՐԵՍ: Եվրանեսթ խորհրդարանական վեհաժողովում Հայաստանի պատվիրակությունը կղեկավարի Ազգային ժողովի «Իմ քայլը» խմբակցության պատգամավոր Գայանե Աբրահամյանը:
Ինչպես հաղորդում է «Արմենպրես»-ը, նման որոշում է ընդունվել Ազգային ժողովի խորհրդի՝ հուլիսի 13-ին կայացած նիստի ընթացքում:
ԱԺ խորհրդի որոշմամբ՝ «Իմ քայլը» խմբակցության պատգամավոր Նարեկ Մկրտչյանը ևս ընդգրկվել է պատվիրակության կազմում:
Եվրանեսթ խորհրդարանական վեհաժողովում Հայաստանի պատվիրակությունը ղեկավարում էր «Իմ քայլը» խմբակցության պատգամավոր Մխիթար Հայրապետյանը, սակայն հունիսի 18-ին նա հայտարարեց, որ դադարեցնում է Եվրանեսթ խորհրդարանական վեհաժողովում ՀՀ պատվիրակության ղեկավարի լիազորությունները: «Ֆեյսբուք»-ի ուղիղ եթերում Մխիթար Հայրապետյանը հայտնել էր, որ ընտրվել է «Քաղաքացիական պայմանագիր» կուսակցության վարչության անդամ, ինչն ավելի է մեծացնելու իր ֆիզիկական զբաղվածությունը: Որպես պատճառ Մխիթար Հայրապետյանը նշել էր ծանրաբեռնվածությունը, քանի որ ղեկավարում է նաև ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովը:
