2 րոպեի ընթերցում
ԵՐԵՎԱՆ, 23 ՀՈԿՏԵՄԲԵՐԻ, ԱՐՄԵՆՊՐԵՍ: Կիբերանվտանգությունն այն ոլորտներից մեկն է, որտեղ Միացյալ Նահանգներն ու ԵԱՏՄ-ն կարող են համագործակցել: «Արմենպրես»-ի հաղորդմամբ`«Եվրասիական շաբաթ» համաժողովի ընթացքում այս մասին ասաց ԱՄՆ նախագահի անձնական իրավաբան, ու ոչ պաշտոնապես Դոնալդ Թրամփի կիբերանվտագության հարցերով խորհրդական, Նյու-Յորքի նախկին քաղաքապետ Ռուդոլֆ Ջուլիանին:
Նա նշեց, որ Հայաստանի նման փոքր երկրի պարագայում շատ ավելի հեշտ է հասնել 90-95 տոկոս անվտանգության կիբերանվտանգության ոլորտում: «Որպես առաջնային քայլ անհրաժեշտ է բոլոր կիբերհանցագործությունները վերլուծել, ընտրել իսկապես վտանգավորներն ու կենտրոնանալ հենց դրանց վրա: Պետք է ներքին մեխանիզմ ստեղծել` բացահայտելու տեղ գտած ներխուժումները»,-ասաց նա՝ պակաս կարևոր չհամարելով նաև կիբերանվտանգության համակարգի իմիտացիաների ստեղծումը:
«Կիբերպաշտպանությունը գաղտնիքներ չունի, և եթե ես ներկայացնեմ, թե ինչպես պետք է պաշտպանվել, դա կնշանակի, որ ես հնարավորություն չեմ տալիս առևանգել ինձանից ինֆորմացիա: Ես կիբերանվտանգության ոլորտում տեղեկատվություն կիսելու մեջ ռիսկեր չեմ տեսնում: Եթե երկրներից մեկն ունի կիբերպաշտպանության շատ լավ լուծում, ինչո՞ւ չպիտի կիսվի ձեզ հետ այդ լուծմամբ»,-նշեց նա:
Ջուլիանին փաստեց՝ չկա որևէ կախարդական բան, որը կարող ես անել, որ կիբերտարածքում հաղորդակցությունը դառնա հարյուր տոկոսանոց անվտանգ:
«Ես կասկածում եմ, որ կլինի գիտության այնպիսի աստիճանի զարգացում, որը կհասնի այս հարյուր տոկոսանոց անվտանգության մակարդակին»,-հավելեց նա: