368.45
Հանրային ռադիոն վերագործարկում է վրացերեն լուրերը
1 րոպեի ընթերցում
ԵՐԵՎԱՆ, 12 ՀՈՒԼԻՍԻ, ԱՐՄԵՆՊՐԵՍ: Հանրային ռադիոյի արտասահմանի համար տրվող հաղորդումների խմբագրությունը երկու տարվա դադարից հետո կրկին վերսկսում է իր վրացական բաժնի աշխատանքները, որը միակն է Հայաստանում:
Ինչպես «Արմենպրես»-ին տեղեկացրին Հանրային Ռադիոյի PR բաժնից, լուրերն այսուհետ ամեն օր հասանելի կլինեն նաև վրացերենով՝ թե տեքստային, թե ձայնային տարբերակներով: Վրացերեն լուրերը հասանելի կլինեն Հայաստանում և Հայաստանից դուրս կայքի միջոցով:
«Վրացական ծառայություն ունենալը շատ կարևոր է բոլորիս համար»,-ասում է Հանրային Ռադիոյի գործադիր տնօրեն Մարկ Գրիգորյանը և հավելում, որ ֆինանսական խնդիրների պատճառով չէր ստացվում վերսկսել վրացերեն լուրերի թողարկումները: Մարկ Գրիգորյանը փաստում է, որ արդեն այդ խնդիրների լուծման շեմին են և փորձել են օր առաջ գործարկել վրացական ծառայությունը:
Հանրային ռադիոյի վրացական ծառայությունը միշտ կարևոր տեղ է զբաղեցրել վրացախոս հայերի շրջանում, մասնավորապես` Վրաստանի հայերի համար: Լրահոսն ամփոփում է հայաստանյան և միջազգային կարևոր տնտեսական, քաղաքական, մշակութային, սպորտային ու սոցիալական իրադարձությունները:
Բաժանորդագրվեք մեր ալիքին Telegram-ում