Քաղաքագետը Սարգսյան-Փաշինյան հանդիպման տրամաբանական շարունակությունը համարում է հասարակական կարգի վերականգնումը
2 րոպեի ընթերցում
ԵՐԵՎԱՆ, 22, ԱՊՐԻԼԻ, ԱՐՄԵՆՊՐԵՍ: ՀՀ վարչապետ Սերժ Սարգսյանի կողմից Ազգային ժողովի պատգամավոր Նիկոլ Փաշինյանի հետ բանակցությունների գնալը քայլ էր, որպեսզի կրքերը հանդարտվեին: «Արմենպրես»-ի հետ զրույցում՝ այս մասին ասաց, քաղաքագետ Հրանտ Մելիք-Շահնազարյանը:
«Ես կարծում եմ, որ այն դիրքորոշումը, որով այս ցույցերի ղեկավարը մոտեցավ բանակցությունների սեղանին՝ բանակցությունների տեղ չէր տալիս: Ըստ էության դա վերջնագիր էր, որն իշխանությունները, բնականաբար, չէին կարող ընդունել: Բողոքի ցույցերի և զանգվածայնությունը, և քաղաքական ուժերի ներկայությունն ու մասնակցությունը թույլ չեն տալիս ենթադրելու, որ հասարակությունը իրոք դեմ է գործող իշխանությանը»,- նշեց քաղաքագետը:
Նրա խոսքով՝ սա քայլ էր իշխանությունների կողմից՝ կրքերը հանդարտեցնելու և հասկացնելու Փաշինյանին և նրա կողմնակիցներին, որ կարելի է երկխոսության միջոցով լուծել խնդիրները:
«Կարծում եմ, որ այս գործընթացի տրամաբանական շարունակությունը կլինի այն, որ օրենքի շրջանակում Երևան քաղաքի հասարակական կարգը կվերականգնվի»,-ընդգծեց Հրանտ Մելիք-Շահնազարյանը:
ՀՀ վարչապետ Սերժ Սարգսյանի և Ազգային ժողովի պատգամավոր Նիկոլ Փաշինյանի հանդիպումը, որը տեղի է ունեցել ապրիլի 22-ին, տևել է մի քանի րոպե: