Օտարերկրացի 50 քաղաքական գործիչ Երեւանում կմասնակցի Ֆրանկոֆոնիայի ԽՎ քաղաքական հանձնաժողովի նիստին
1 րոպեի ընթերցում
ԵՐԵՎԱՆ, 19 ՄԱՐՏԻ, ԱՐՄԵՆՊՐԵՍ: Աշխարհի 27 երկրների խորհրդարանների՝ Ֆրանկոֆոնիայի խորհրդարանական վեհաժողովի քաղաքական հարցերի հանձնաժողովի անդամները՝ ընդհանուր թվով 50 պետական-քաղաքական գործիչներ մարտի 19-21-ը լինելու են Հայաստանում:
«Արմենպրես»-ի հաղորդմամբ՝ այս մասին սոցցանցի իր էջում գրառում է կատարել ՀՀ Ազգային ժողովի պատգամավոր Մարգարիտ Եսայանը, ում հրավերով եւ օտարերկրացի քաղաքական գործիչները գալիս են Հայաստան:
«Երեւանում անցկացվելու է քաղաքական հանձնաժողովի հերթական նիստը, օրերը լինելու են խիստ հագեցած եւ լեցուն, ուստի, պիտի խնդրեմ ԶԼՄ-ներին լինել օպերատիվ, լուսաբանել այս կարեւոր աշխատանքը… Հանձնաժողովի աշխատանքները ընթանալու են բացառապես ֆրանսերենով, սա է Ֆրանկոֆոնիայի կազմակերպության աշխատանքային լեզուն եւ բնական աշխատանքային գործընթաց է։ Համաժամանակյա թարգմանություն չի լինելու, երբեք չի լինում, քանզի Ֆրանկոֆոնիայի ԽՎ աշխատանքային լեզուն աշխարհի բոլոր անկյուններում եղել եւ լինելու է ֆրանսերենը։ Ուստի, պատրաստ եմ օգտակար լինել բոլորիդ։ Ֆրանկոֆոնիայի միջազգային կազմակերպության 17-րդ գագաթնաժողովից առաջ… սա լուրջ քննություն է, որը մենք պարտավոր ենք պատվով հանձնել»,-գրել է նա։