Լեհաստանի խորհրդարանական պատվիրակությունը հարգանքի տուրք մատուցեց Հայոց ցեղասպանության զոհերի հիշատակին

ԵՐԵՎԱՆ, 18 ՄԱՐՏԻ, ԱՐՄԵՆՊՐԵՍ: Լեհաստանի Սենատի պատգամավորական պատվիրակությունը Ծիծեռնակաբերդում հարգանքի տուրք մատուցեց Հայոց ցեղասպանության զոհերի հիշատակին:

Ինչպես հաղորդում է «Արմենպրես»-ը, Լեհաստանի խորհրդարանական պատվիրակությունը, Սենատի արտաքին հարաբերությունների և ԵՄ-ի հետ կապերի հանձնաժողովի նախագահ Մարեկ Ռոցկիի գլխավորությամբ, այցելեց Հայոց ցեղասպանության զոհերի հիշատակը հավերժացնող Ծիծեռնակաբերդի հուշահամալիր, հարգեց Ցեղասպանության զոհերի հիշատակը: Լեհական պատվիրակությանը ուղեկցում էր Հայաստանի խորհրդարանի արտաքին հարաբերությունների մշտական հանձնաժողովի անդամ Շիրակ Թորոսյանը:

Անմար կրակի մոտ ծաղիկներ խոնարհելուց հետո Լեհաստանի խորհրդարանական պատվիրակության անդամները շրջայց կատարեցին նաև Հայոց ցեղասպանության թանգարան-ինստիտուտում, ծանոթացան Հայոց ցեղասպանության մասին վկայություններին և նյութերին:

Լեհաստանն այն երկրներից է, որը ճանաչել ու դատապարտել է Հայոց ցեղասպանությունը: Լեհաստանի խորհրդարանը 2005թ. ապրիլի 19-ին Հայոց ցեղասպանությունը ճանաչող և դատապարտող բանաձև է ընդունել: