Գեղարքունիքի մարզպետը և Սարատովի նահանգապետը ներկա են գտնվել «Միշտ հին ու նոր իմ Հայաստան» համերգին
2 րոպեի ընթերցում
ԵՐԵՎԱՆ, 26 ՆՈՅԵՄԲԵՐԻ, ԱՐՄԵՆՊՐԵՍ: Գեղարքունիքի մարզպետ Կարեն Բոթոյանը Սարատովի մարզի նահանգապետ Վալերի Ռադաևի ուղեկցությամբ նոյեմբերի 25-ին Սարատովի Ալֆրեդ Շնիտկեի անվան ֆիլհարմոնիայի դահլիճում ներկա է գտնվել հայկական մշակութային օրերի շրջանակներում կազմակերպված «Միշտ հին ու նոր իմ Հայաստան» խորագիրը կրող համերգին: Այս մասին «Արմենպրես»-ին տեղեկացրին Գեղարքունիքի մարզպետարանից՝ հավելելով. «Միջոցառման մեկնարկին, դիմելով ներկաներին, նահանգապետ Վ. Ռադաևը նշել է, որ հայ ժողովրդի շատ զավակներ, ինչպիսիք են Հովհաննես Այվազովսկին, Արամ Խաչատրյանը, Մարտիրոս Սարյանը և այլոք, համաշխարհային մշակույթի զարգացման գործում ունեն հսկայական ներդում, իսկ հայ ժողովուրդը, որը դարերի խորքից պահպանել և փոխանցել է աշխարհի հնագույն այբուբեններից մեկը, քրիստոնեական արժեքները, արժանի է ամենախորը հարգանքի:
Պատասխան խոսքում Կարեն Բոթոյանը շնորհակալություն է հայտնել Սարատովի մարզի կառավարությանը և անձամբ նահանգապետին ջերմ ընդունելության համար, հավելելով, որ բարձր է գնահատում նահանգապետի ցուցաբերած մեծ աջակցությանը հայկական մշակույթի պահպանման և զարգացման գործում:
Համերգին ներկա են գտնվել Սարատովի երկրամասի օրենսդիր և գործադիր իշխանությունների ինչպես նաև, տարբեր ազգային փոքրամասնությունների ներկայացուցիչներ:
Հիշեցնենք, որ Գեղարքունիքի մարզպետ Կարեն Բոթոյանն աշխատանքային այցով գտնվում է Սարատովի երկրամասում, որի ընթացքում տեղի են ունեցել երկկողմ հանդիպումներ, ի թիվս այլ հարցերի, քննարկվել են ներդրումային հնարավորություններ: Այցի ընթացքում Կարեն Բոթոյանը հանդիպումներ է ունեցել նաև հայ համայնքի ներկայացուցիչների հետ՝ ներկայացնելով մարզի սոցիալ–տնտեսական վիճակը և մատնանշել ներդրումային ուղղություններ, ինչպես նաև պատասխանել է համայնքի ներկայացուցիչների հարցերին:
ՀՀ Գեղարքունիքի մարզի Վարդենիսի քաղաքապետ Արամ Հարությունյանը եւ Մարտունու քաղաքապետ Արմեն Ավետիսյանը համագործակցության հուշագրեր են ստորագրել Սարատովի մարզի Կրասնի Կուտ եւ Վոլսկ քաղաքների իրենց գործընկերների հետ: