Էմին Երիցյանը ՏԻՄ ընտրություններին բնակչության մասնակցության մակարդակը բավարար չի համարում 

ԵՐԵՎԱՆ, 6 ՆՈՅԵՄԲԵՐԻ, ԱՐՄԵՆՊՐԵՍ։ Համայնքների խոշորացման գործընթացում և տեղական մակարդակով ընտրական համակարգում ռեֆորմների կարիք կա։

«Արմենպրես»-ի հաղորդմամբ՝ խոսելով նոյեմբերի 5-ին տեղի ունեցած տեղական ինքնակառավարման մարմինների ընտրությունների արդյունքների վերաբերյալ, լրագրողների հետ զրույցում ասաց ՀՀ համայնքների միության նախագահ Էմին Երիցյանը։

Մասնագետի պնդմամբ՝ ընտրություններին բնակչության մասնակցության ակտիվությունը բավարար չէ։ Նրա գնահատմամբ, ընտրողների մասնակցությունը ցածր է, ինչը տարեցտարի երևացող միտում է։

«Պասիվության պատճառները տարբեր են, օրինակ՝ քաղաքական կուսակցությունները բավականին պասիվ են։ Մեկ այլ պատճառ է նաև համայնքների խոշորացման և ընտրական համակարգի խնդիրը։ Այս ընտրությունները մեկ անգամ ևս փաստեցին, որ խոշորացման գործընթացում և տեղական մակարդակով ընտրական համակարգում ռեֆորմների կարիք կա։ Խոշորացման պրակտիկան դրա հետ անհամատեղելի է»,- նշեց Երիցյանը։

Ընտրություններին մարդկանց պասիվությունը հիմնականում եղել է այնտեղ, որտեղ միայն համայնքի ղեկավար են ընտրել։ Այնտեղ, որտեղ ընտրել են նաև ավագանի՝ մասնակցությունն ավելի բարձր է եղել։

Նոյեմբերի 5-ին Հայաստանի Հանրապետության 69 համայնքում տեղի են ունեցել տեղական ինքնակառավարման մարմինների ընտրություններ։