2 րոպեի ընթերցում
ԵՐԵՎԱՆ, 23 ՄԱՅԻՍԻ, ԱՐՄԵՆՊՐԵՍ: Թուրքիայի վերջին տարիների քաղաքականությունը ցույց է տալիս, որ այդ երկրի նախագահ Ռեջեփ Թայիփ Էրդողանը և իր թիմակիցները եվրաինտեգրմանը մեծ նշանակությունը չեն տալիս, քանզի ներկայումս թուրքական իշխանության հայացքը սևեռած է դեպի Մերձավոր Արևելք: «Արմենպրես»-ի հաղորդմամբ` մայիսի 23-ին լրագրողների հատ հանդիպման ժամանակ այս մասին ասաց Արևելագիտության ինստիտուտի տնօրեն Ռուբեն Սաֆրաստյանը:
«Էրդողանը փորձում է հակակշռել եվրաինտեգրման նկատմամբ հետաքրքրության նվազումը Մերձավոր Արևելքում դիրքերի ուժեղացմամբ: Բացի այդ, Էրդողանը ներկայացնում է հասարակության այն հատվածը, որոնք հակված են Թուրքիան տեսնելու որպես մեծ, հզոր պետություն, որը վարում է ինքնուրույն քաղաքականություն»,- նշեց Սաֆրաստյանը:
Անդրադառնալով ԱՄՆ մայրաքաղաք Վաշինգտոնում Էրդողանի անվտանգության ծառայողների սանձարձակ գործողություններին՝ Սաֆրաստյանը նշեց, որ իր համար այդ ամենը նորություն չէր:
«Էրդողանի համար դա սովորական գործելակերպ է: Լատինաամերիկյան երկրներից մեկում այս դեպքից երկու տարի առաջ նույն բանը տեղի ունեցավ, երբ Էրդողանի անվտանգության ծառայողների կողմից դաժան ծեծի ենթարկվեցին նրա դեմ բողոք արտահայտող խաղաղ ցուցարարները: Սա նրա քաղաքական ոճն է , որը պետք է ուսումնասիրվի հոգեբանների և հոգեբույժների կողմից»,- ընդգծեց նա:
Արևելագետը Թուրքիայում ներքաղաքական կյանքում լուրջ ցնցումներ չի ակնկալում:
«Չնայած հասարակությունում կա ընդդիմություն մեծ զանգված, ինչի ապացույցն էին հանրաքվեի արդյունքները, Էրդողանին հաջողվեց զինաթափել բանակի ղեկավարությանը: Թուրքիայում բարձրագույն սպայակազմը չունի այն դիրքերը և վճռականությունը, որն ուներ մինչև Էրդողանի գալը կամ նրա կառավարման առաջին տարիներին:
Ինչպես ցույց է տալիս պատմական փորձը, քաղաքական լուրջ փոփոխություններ լինում են այն դեպքում, երբ քաղաքականության մեջ իր գործողությունները սկսում է իրականացնել բարձրագույն սպայակազմը»,-նշեց Սաֆրաստյանը: