398.74
Բարեկարգվում է Խաղաղ Դոնի 5 շենքի բակը
1 րոպեի ընթերցում
ԵՐԵՎԱՆ, 18 ՀՈԿՏԵՄԲԵՐԻ, ԱՐՄԵՆՊՐԵՍ: Մայրաքաղաք Երևանի համաչափ զարգացման համատեքստում ավարտին են մոտենում բակերի համալիր բարեկարգման 2016թ. աշխատանքները: Երևանի քաղաքապետարանի այս տարվա ծրագրով ավարտական փուլում են նաև Էրեբունի վարչական շրջանի Խաղաղ Դոնի 5 շենքի բակի բարեկարգման աշխատանքները: Այս մասին «Արմենպրես»-ին տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից:
Արդեն ձևավորվել են խաղահրապարակներն ու սիզամարգային հատվածները, անցկացվել է արտաքին լուսավորության ցանց, տեղադրվել են նստարաններ, աղբամաններ, բակային հանգստի կազմակերպման զրուցատաղավարներ, իսկ երեխաների համար` նաև մանկական խաղեր:
Պատշաճ տեսքի է բերվել բակի մինի ֆուտբոլի խաղադաշտը, թարմացվել են ենթակառուցվածքները: Դեռևս ընթացքի մեջ է հարակից փոքրիկ շատրվանի կառուցման գործընթացը, որին կհաջորդի տարածքի վերջնական բարեկարգումը: Արդյունքում Երևանի քաղաքապետարանի և մայրաքաղաքի վարչական շրջանների կողմից վերջին տարիներին բարեկարգված և պատշաճ տեսքի բերված բակերի թիվը կավելանա ևս մեկով:
Բաժանորդագրվեք մեր ալիքին Telegram-ում