2 րոպեի ընթերցում
ԵՐԵՎԱՆ, 7 ՍԵՊՏԵՄԲԵՐԻ, ԱՐՄԵՆՊՐԵՍ: Վրաստանի վարչապետ Գիորգի Կվիրիկաշվիլիի` Հայաստան կատարած այցի ժամանակ բանակցային սեղանին դրվել են մի շարք կարևոր հարցեր, մասնավորապես, տնտեսական, զբոսաշրջային, առևտրային, էներգետիկ, տրանսպորտային ոլորտներում համագործակցության վերաբերյալ: «Արմենպրես»-ի հաղորդմամբ` սեպտեմբերի 7-ին լրագրողների հետ հանդիպման ժամանակ նման կարծիք հայտնեց Հայաստանի պետական կառավարման ակադեմիայի տարածաշրջանային ուսումնասիրությունների կենտրոնի գիտաշխատող Ջոնի Մելիքյանը: Վրացագետն, անդրադառնալով Վրաստանի վարչապետի Հայաստան կատարած այցին նկատեց, որ Գեորգի Կվիրիկաշվիլին վարչապետ նշանակվելուց հետո առաջին անգամ է պաշտոնական այցով ՀՀ-ում, ուստի այն բավականին կարևոր է երկու պետությունների համար:
Նրա խոսքով՝ Վրաստանի կառավարությունը ակտիվ աշխատում է հարևան երկրների հետ և փորձում է իրականացնել տարածաշրջանային նախագծեր: Այդ պատճառով էլ տեղի են ունեցել այցելություններ նաև Անկարա և Բաքու:
«Հայաստանը Վրաստանի առևտրային գործընկերների տասնյակի մեջ է, բայց կողմերը տարբեր հանդիպումների շրջանակում հայտարարում են, որ կարիք կա երկու երկրների առևտրային հարաբերություններ խորացմանը: Կարևոր խնդիր է տուրիզմի զարգացումը: 2015 թվականին, ըստ Վրաստանի պաշտոնական տվյալների, զբոսաշրջության ոլորտից ստացել է մոտ 1.9 մլրդ դոլար, ինչն ավելացել է նախորդ տարվա համեմատ: 2015 թվականին Վրաստան այցելող զբոսաշրջիկների թվով Հայաստանը առաջինն էր: Վերջինից Վրաստան էր այցելել 1.4 մլն մարդ: Եթե համեմատենք 1.9 մլրդ դոլարի հետ, կարելի է ասել որ բավականին լուրջ ներդրում ունի Հայստանի քաղաքացին Վրաստանի տնտեսության մեջ: Այդ գումարը բավարար է, որ Վրաստանը իր տենտեսական կայունությունը պահի»,- նկատեց Ջոնի Մելիքյանը:
Անդրադառնալով էներգետիկ համագործակցությանը` վրացագետը նշեց, որ դեռևս ապրիլին չորս երկրների՝ Հայաստանի, Վրաստանի, Ռուսաստանի և Իրանի կողմից ստորագրվել էր կարևոր փաստաթուղթ` հիմք դնելով ապագայում միացյալ էներգոհամակարգ ունենալուն: