1 րոպեի ընթերցում
ԵՐԵՎԱՆ, 17 ՕԳՈՍՏՈՍԻ, ԱՐՄԵՆՊՐԵՍ: 31-րդ ամառային օլիմպիական խաղերում Հայաստանի օլիմպիական հավաքականը նվաճեց հերթական արծաթե մեդալը: «Արմենպրես»-ը հայտնում է, որ 66 կգ քաշային կարգում հունահռոմեական ոճի ըմբիշ Միհրան Հարությունյանը եզրափակիչում պարտվել է Դավոր Շտեպանեկին և մրցավարական կողմնակալության պատճառով դարձել արծաթե մեդալակիր:
Մենամարտի սկզբում մրցավարները նախազգուշացում տվեցին մեր ըմբիշին և պասիվության համար հայ մարզիկը անցավ պարտեր, սակայն կարողացավ պատվով դուրս գալ դժվարին վիճակից: Հաջորդ իսկ դրվագում Միհրանը 1 միավոր վաստակեց՝ հակառակորդին դուրս հրելով գորգից: Առաջին մրցափուլն ավարտվեց Միհրան Հարությունյանի նվազագույն առավելությամբ:
2-րդ կեսի մեկնարկում Միհրանը վնասվածք ստացավ և մի փոքր արյունահոսեց, բայց պատվախնդիր կերպով վերադարձավ և կարողացավ շարունակել գոտեմարտը: Մրցավարներն այս գոտեմարտում էլ հայ ըմբիշին խանգարեցին գորգում և պասիվության համար մեր մարզիկի մրցակիցը ստացավ մեկ միավոր: Վերջին վաստակած միավորը օլիմպիական ոսկին նվիրեց սերբ մարզիկին: